नरेंद्र मोदी ठरणार जगातील पहिलेच नेते
नवी दिल्ली : पंतप्रधान नरेंद्र मोदी शनिवारी पोर्तुगाल, अमेरिका आणि नेदरलँड या तीन देशांच्या दौर्‍यावर रवाना झाले असून ते पोर्तुगालमध्ये पोहोचले. त्यानंतर ते अमेरिका आणि नेदरलँड येथेही जातील, असं ट्विट पंतप्रधान कार्यालयानं केले आहे. पंतप्रधान मोदी 26 जूनला अमेरिकेच्या दौर्‍यावरही जातील. तर 27 जूनला ते नेदरलँडला जाणार आहेत. परराष्ट्र मंत्रालयाचे प्रवक्ता गोपाल बागले यांच्या माहितीनुसार, गेल्या वर्षी झालेल्या अमेरिकेच्या राष्ट्राध्यक्षपदाच्या निवडणुकीनंतर पंतप्रधान नरेंद्र मोदी यांचा हा पहिलाच दौरा आहे. त्यामुळे या दौर्‍याला विशेष महत्त्व प्राप्त झाले आहे. ट्रम्प हे अध्यक्षपदी निवडून आल्यानंतर मोदी पहिल्यांदाच ट्रम्प यांची भेट घेतील.
भेटति विविध मुद्द्यांवर चर्चा
अमेरिकेत पंतप्रधान मोदींचे जोरदार स्वागत करण्यात येणार आहे. तेथे व्हाईट हाऊसमध्ये ते ट्रम्प यांच्यासोबत डिनर घेतील. ट्रम्प अध्यक्ष झाल्यानंतर त्यांच्यासोबत व्हाईट हाऊसमध्ये डिनर घेणारे नरेंद्र मोदी हे जगातील पहिलेच नेते ठरणार आहेत. व्हाईट हाऊसमधील एका वरिष्ठ अधिकार्‍याच्या माहितीनुसार, ट्रम्प अध्यक्षपदी विराजमान झाल्यानंतर त्यांच्यासोबत व्हाईट हाऊसमध्ये डिनर करणारे मोदी जगातील पहिलेच नेते आहेत. ट्रम्प आणि मोदी भेट महत्त्वाची ठरणार आहे. हे दोन्ही नेते दहशतवाद, एच 1 बी व्हिसा यांसह विविध मुद्द्यांवर चर्चा करतील. दोन्ही नेत्यांमध्ये संरक्षणासंबंधी मुद्द्यांवरही चर्चा होईल.