नवरदेव, नवरीने बजावला लग्नापूर्वी मतदानाचा हक्क
बुलडाणा : मतदानाचे महत्व जाणून बुलडाणा जिल्ह्यातील दोन ठिकाणी नवरदेव व नवरीने लग्ना अगोदर मतदानाचा अधिकार बजावल्याचा प्रकार 16 फेब्रुवारी रोजी जि.प.व पं.स.निवडणूकीच्या मतदान केंद्रावर समोर आला आहे. या नवरदेव नवरीने सुरूवातील मतदान केले व त्यानंतर बोहल्यावर चढले. मतदान करणे हा प्रत्येक नागरिकाचा हक्क आहे. परंतू सद्यपस्थितीत अनेकजण मतदानासाठी मिळणार्‍या सुट्टीचाही दुरूपयोग करतात.
मतदानाला मिळालेल्या सुट्टीला मतदान न करता बाहेरगावी फिरण्यात या सुट्टीचा आनंद घेताता. परिणामी मतदानाचा टक्का दिवसेंदिवस घटत चालला आहे. परंतू बुलडाणा जिल्ह्यातील नवरदेव नवरीने सुरूवातीला मतदानाचा हक्क बजावून त्यानंतर शुभमंगल केल्याचा प्रकार जि.प.व पं.स निवडणूकीच्या मतदान केंद्रावर समोर आला आहे. मोताळा तालुक्यातील धामणगाव बढे-लिहा सर्कलमधील ऊर्‍हा येथील सचिनसिंग राजपूर या युवकाने 16 फेब्रुवारीरोजी सकाळी सुरूवातीला मतदान केले व त्यानंतर लग्नाच्या बोहल्यावर चढला. लग्नापेक्षाही मतदानाच्या अधिकाराला अधिक महत्व देणार्‍या उर्‍हा येथील या युवकाचे आदर्श मतदान ठरले. त्यानंतर असाच प्रकार लोणार तालुक्यातील नांद्रा येथे घडला. आश्रुबा माणिकराव मुंढे यांची सुकन्या चि.सौ.कां. अनिता या नववधुने लग्णाच्या दिवशी सुरूवातीला मतदानाचा हक्क बजावला व त्यानंतर लग्न मंडपात गेली. बुलडाणा जिल्ह्यात दोन ठिकाणी घडलेल्या या आदर्श मतदानाने मतदानाचे महत्व पटवून दिले आहे. दोन्ही ठिकाणच्या या नवरदेव नवरीने लग्नापेक्षा मतदानाला महत्व दिल्याने त्यांच्या मतदानाची सर्वत्र चर्चा होत आहे.