नवापूर सीमा तपासणीत 34 लाखांची बनावट दारू जप्त

नवापूर । बनावट दारूची वाहतूक होत असल्याच्या माहितीवरून कारवाई करीत नवापूर सीमा तपासणी नाक्यावर पोलिसांनी सापळा रचून दारूचे 800 खोके असलेला ट्रक पकडला. यात तब्बल 34 लाखांची बनावट दारू जप्त करण्यात आली असून नवापूर पोलिसांची ही आजपर्यंतची सर्वात मोठी कारवाई मानली जात आहे. शनिवारी सकाळी दहा वाजेच्या सुमारास ही मोठी कारवाई करण्यात आली. यात दोघांना अटक करण्यात आली असून मुख्य सुत्रधाराचा पोलिसांतर्फे शोध सुरू आहे. एकिकडे राज्य उत्पादन शुल्काच्या दुर्लक्षावर बोट ठेवले जात असून पोलिसांच्या या कारवाईचे मात्र, कौतुक होत आहे. सलिम सहाबुद्दीन (वय 45 रा.152/2 जुना रिसाला इंदोर मध्यप्रदेश) ट्रक चालक सोहेल साहिद खान (वय 25 रा. वय-45 रा.सुभाषनगर रतलाम मध्यप्रदेश) अशी अटक झालेल्यांची नावे आहे.

नवापूर पोलिसांची सर्वात मोठी कारवाई; सापळा रचून पकडले
गुजरात राज्यात विधानसभा निवडणुकी सुरू असल्याने मोठ्या प्रमाणात दारूची तस्करी केली जात आहे. दारूचा ट्रक महामार्गाने गुजरातकडे जात असल्याची माहिती मिळाल्यानंतर नवापूर तालुक्यातील हद्दीत ट्रकचा पाठलाग करण्यात आले ट्रकचालकाला शंका आल्यास तो पळ काढू नये म्हणून अनेक ठिकाणी सापळे रचण्यात आले होते. नवापूर तालुक्यातील बेडकीपाडा येथील सीमावर्ती भागात ट्रक थांबताच नवापूर पोलिस निरीक्षक विजयसिंह राजपूत यांच्या पथकाने तत्काळ ट्रक ताब्यात घेतला. यात ट्रक चालक सलिम सहाबुद्दीन (वय 45 रा.152/2 जुना रिसाला इंदोर मध्यप्रदेश) ट्रक चालक सोहेल साहिद खान (वय 25 रा.वय 45 रा.सुभाषनगर रतलाम मध्यप्रदेश) या दोन जणांना अटक करण्यात आली.

यांनी केली कारवाई
नंदुरबार पोलिस अधीक्षक संजय पाटील यांच्या मार्गदर्शनाखाली नवापूर पोलिस निरीक्षक विजयसिंह राजपूत व सहकारी सहायक पोलिस निरीक्षक दिपक पाटील, व पोलीस कर्मचारी राजेंद्र सोनवणे योगेश थोरात, महेंद्र नगराळे, आदीनाथ गोस्वामी, कृष्णा पवार, रितेश हंदवे, जितेंद्र तोरवणे, महेश पवार, गणेश सोनवणे आदींनी कारवाई केली. नवापूर पोलिस ठाण्यात पंचनामा करून पोलिसांनी माल ताब्यात घेतला.