नागपूर मेट्रो प्रकल्पाच्या सामंजस्य करारासह पुणे मेट्रोच्या टप्पा एकच्या अंमलबजावणीस मंजुरी

मुंबई – नागपूर मेट्रो रेल्वे प्रकल्पासाठी राज्य शासन, केंद्र शासन आणि नागपूर मेट्रो रेल्वे प्रकल्प यांच्या दरम्यान झालेल्या करारास कार्योत्तर मंजुरी आणि पुणे महानगर मेट्रोच्या अंमलबजावणीसाठी राज्य, केंद्र आणि महाराष्ट्र मेट्रो रेल कार्पोरेशन यांच्यातील प्रस्तावित कराराच्या मसुद्यास मंगळवारी मंत्रिमंडळाच्या बैठकीत मान्यता देण्यात आली.

पुणे आणि नागपूर शहरांतील सार्वजनिक वाहतुकीच्या सुविधांत वाढ होण्यासाठी मेट्रो प्रकल्प राबविण्यात येत असून त्याबाबतचे करार संबंधित संस्थांशी करण्यात येत आहेत. राज्यशासनाने 30 जानेवारी 2014 च्या निर्णयानुसार नागपूर मेट्रो रेल प्रकल्पाला मान्यता दिली होती. त्यानंतर केंद्र, राज्य, आणि नागपूर मेट्रो रेल कार्पोरेशन यांच्यात त्रिपक्षीय करार करण्यात आला. त्यास आज मंजुरी देण्यात आली. तसेच २३ डिसेंबर 2016 च्या निर्णयानुसार पुणे महानगर मेट्रो रेल प्रकल्पास मंजुरी देण्यात आली असून केंद्र शासनाने कळविल्यानुसार केंद्र, राज्य आणि महाराष्ट्र मेट्रो रेल कार्पोरेशन यांच्यातील त्रिपक्षीय कराराच्या मसुद्यास आज मंजुरी देण्यात आली.

या कराराच्या अनुषंगाने येणारा खर्च महाराष्ट्र रेल कार्पोरेशन यांनी प्रकल्पाच्या अनुषंगाने स्थानिक, प्राधिकरण, शासकीय-निमशासकीय संस्था यांच्याकडील जमिनी घेऊन त्यांच्या विकासातून भागवायचा आहे. नागपूर व पुणे डीपीआरमध्ये दर्शविलेल्या बाबींशिवायच्या खर्चासाठी राज्य शासनाची मान्यता आवश्यक राहणार आहे. राज्य शासनावर वित्तीय भार वाढल्यास त्याची परिपूर्ती पुणे व नागपूर एसपीव्ही कंपनीकडील एस्क्रो खात्यातून करण्यास मान्यता देण्यात आली.