नाशिकमध्ये युती तुटली; शिवसेनेच्या ३६ नगरसेवकांसह पदाधिकाऱ्यांचा राजीनामा !

नाशिकः राज्यात भाजप आणि शिवसेनेची विधानसभा निवडणुकीसाठी युती झाली आहे. मात्र युती झाल्यामुळे दोन्ही पक्षातील नाराजांची संख्या वाढली आहे. काही ठिकाणी नाराजांनी अपक्ष उमेदवारी दाखल करत बंडखोरी केली आहे. राज्यभरात भाजप-सेनेची युती असली तरी आज मंगळवारी नाशिकमधील भाजप-शिवसेनेतील युती तुटली आहे. शिवसेनेच्या ३५० पदाधिकाऱ्यांसह ३६ नगरसेवकांनी राजीनामे दिले आहे. यामुळे नाशिकमध्ये भाजपला मोठा धक्का बसला आहे.

नाशिक पश्चिमची जागा भाजपला सोडल्याने भाजपच्या आमदार सीमा हिरे यांच्या विरोधात शिवसेनेचे गटनेते विलास शिंदे यांनी बंडखोरी केली आहे. या मतदारसंघात भाजपने घुसखोरी केल्याचे सांगत शिंदेच्या समर्थनार्थ शिवसेनचे महानगर प्रमुख, पालिकेतील विरोधी पक्षनेते आणि ३५ नगरसेवकांनी आज शिवसेना पक्षप्रमुख उद्धव ठाकरे यांच्याकडे पदाचे राजीनामे दिले आहेत. त्यामुळे भाजप आमदार सीमा हिरे यांच्या अडचणी वाढल्या आहेत. यापुढे शिवसैनिक म्हणूनच काम करणार असल्याचं सेनेच्या पदाधिकाऱ्यांनी सांगितलं.

नाशिक पश्चिममधील शिवसेनेची बंडखोरी रोखून नेत्यांची मनधरणी करण्यात भाजप नेते आणि पालकमंत्री गिरीश महाजन यांना अपयश आले आहे. सिंधुदुर्गानंतर आता नाशिकमध्येही शिवसेना-भाजप युतीला झटका बसला आहे.