नितीशकुमारांच्या ताफ्यावर हल्ला

पाटणा : बिहारचे मुख्यमंत्री नितीशकुमार यांच्या ताफ्यावर शुक्रवारी संतप्त जमावाने हल्ला केला. बक्सर जिल्ह्यातील समीक्षा यात्रेदरम्यान हा प्रकार घडला. नंदर भागातून नितीशकुमार यांच्या गाड्यांचा ताफा जात असतांना अचानक काही लोकांनी त्यांच्या गाडीवर दगडफेक केली. त्यात मुख्यमंत्री थोडक्यात बचावले असले तरी त्यांचे काही सुरक्षारक्षक जखमी झाले आहेत.

नितीशकुमार सध्या विकासकामांचा आढावा घेण्यासाठी बिहार राज्याचा दौरा करत आहेत. त्याचवेळी जमावाने मुख्यमंत्र्याच्या गाडीवर दगडफेक केली. या दगडफेकीत गाड्यांच्या काचा फुटल्या आहेत. गावामध्ये कोणत्याही प्रकारचा विकास न केल्यामुळे संतप्त गावकर्‍यांनी मुख्यमंत्र्यांच्या ताफ्यावर हल्ला केल्याची चर्चा आहे.