निमखेडीतील वीर जवानावर शासकीय इतमातात अंत्यसंस्कार

Burial of Veer Jawan in Nimkhedi in state honor मुक्ताईनगर : जम्मू काश्मिरातील उधमपूर येथे सैन्य दलात कार्यरत असलेल्या निमखेडीतील विपीन जनार्दन खर्चे (37) या तरुणाला कर्तव्यावर असताना वाहन दरीत कोसळल्याने वीर मरण आले होते. विपीन खर्चे हे निमखेडी बुद्रुक येथील भाचे आणि जावईदेखील असून मूळचे नेपानगर मध्यप्रदेश येथील रहिवासी आहेत. रविवार, 9 ऑगस्ट रोजी सकाळी वीर जवानाच्या मृतदेहावर शासकीय इतमामासह पोलीस विभागाने दिलेल्या मानवंदनेद्वारे अंत्यसंस्कार करण्यात आले.

लोकप्रतिनिधींची होती उपस्थिती
याप्रसंगी वीर जवानाच्या मातोश्री इंदुबाई खर्चे आणि वीर पत्नी रूपाली खर्चे यांनी सर्वप्रथम पुष्पचक्र अर्पण केले. त्यानंतर स्थानिक लोकप्रतिनिधींच्या हस्ते पुष्पचक्र अर्पण करण्यात आले. त्यात विधान परीषदेचे आमदार एकनाथराव खडसे, आमदार चंद्रकांत पाटील यांच्या पत्नी यामिनी चंद्रकांत पाटील, राष्ट्रवादी काँग्रेस पक्षाचे जिल्हाध्यक्ष रवींद्र पाटील, काँग्रेसचे प्रदेश उपाध्यक्ष डॉ.जगदीश पाटील, जिल्हा बँकेच्या माजी अध्यक्षा अ‍ॅड.रोहिणी खडसे-खेवलकर, प्रदेश काँग्रेसचे प्रवक्ता अ‍ॅड.अरविंद गोसावी, शिवसेनेचे तालुकाप्रमुख छोटू भोई, भाजपाचे प्रदेश उपाध्यक्ष अशोक कांडेलकर, युवा मोर्चाचे जिल्हाध्यक्ष श्रीकांत महाजन, माजी युवा सेना जिल्हाप्रमुख पंकज राणे, माजी सभापती निवृत्ती पाटील, दशरथ कांडेलकर, रंजना कांडेलकर, राजेंद्र माळी, निलेश पाटील, पंचायत समितीचे माजी सभापती विकास पाटील, पंचायत समिती सदस्य राजेंद्र सावळे, ईश्वर राहणे, डॉ.बी.सी.महाजन, रवींद्र कांडेलकर तसेच
महसूल प्रशासनातर्फे तहसीलदार श्वेता संचेती, पोलीस निरीक्षक शंकर शेळके, उपविभागीय अधिकारी विवेक सोनवणे यांनी पुष्पचक्र अर्पण केले. सहाय्यक सैनिक कल्याण अधिकारी जळगाव संजय महाजन यांनी तसेच रतिराम महाजन यांनी देखील पुष्पचक्र अर्पण केले.

जिल्हा पोलिस दलातर्फे सलामी
निमखेडी बु.॥ गावातील महालखेडा रस्त्यावरील वाल्मीक कुटियाजवळ तात्पुरत्या उभारण्यात आलेल्या शेडजवळ पार्थिव ठेवल्यानंतर ध्वज वितरण करण्यात येऊन जळगाव जिल्हा पोलीस दलामार्फत त्यांना अखेरची सलामी देण्यात आली. याप्रसंगी बंदुकीच्या तीन फैरी हवेत झाडण्यात आल्या. वीर पत्नी रूपाली व त्यांचा चार वर्षाच्या मुलगा यांच्या हस्ते अग्नीडाग देण्यात आला. वीर जवानाच्या अंतिम संस्कार प्रसंगी स्वर्गरथ हा सजवण्यात आला तर ावातील महिलांनी रांगोळ्या काढून स्मशानभूमीपर्यंतचा रस्ता सुशोभित केला. प्रसंगी सैनिक विभागातर्फे अंत्यविधी मदत म्हणून कुटुंबीयांकडे 89 हजार रुपयांची रोख स्वरूपात मदत सोपवण्यात आली.

20 हजारांवर नागरीकांची उपस्थिती
वीर जवानाल अखेरचा निरोप देण्यासाठी निमखेडी बुद्रुक, इच्छापूर, मालखेडा, चारठाणा, बोदवड, धामणगाव, कुर्‍हा, नांदवेल, चिंचखेडा बुद्रुक, डोलारखेडा या पंचक्रोशी सह मुक्ताईनगर तालुका व जिल्हाभरातून जवळपास 20 हजार नागरीकांची उपस्थिती होती. वीर जवान अमर रहेच्या घोषणा देत वीर जवान विपीन खर्चे यांचे पार्थिव पंचतत्वात विलीन झाले.