निवडणूक एकत्र लढणार

अमित शहा यांच्याकडून शिवसेनेला गोंजरण्याचे प्रयत्न

बेंगळुरू : नाराज झालेल्या आणि स्वबळावर लढण्याचा नारा देणार्‍या शिवसेनेला गोंजारण्याचे काम भाजपने सुरू केले आहे. शिवसेना आणि भाजपा एकत्रित लोकसभा निवडणूक लढवतील, असे भाजप अध्यक्ष अमित शहा यांनी एका मुलाखतीत म्हटले आहे. टीडीपी स्वत:हून एनडीएबाहेर पडला आहे. मात्र शिवसेना आमच्यासोबत कायम राहणार आहे. आम्ही पुढील निवडणूक एकत्र लढवू, असा विश्‍वास विश्‍वास शहा यांनी व्यक्त केला.

अस्तित्व टिकवण्यासाठी धडपड
कर्नाटक विधानसभा निवडणुकीच्या प्रचारासाठी बेंगळुरू येथे आले असताना अमित शहा एका वृत्तपत्राला मुलाखत देताना बोलत होते. नाराज घटक पक्षांविषयी बोलताना अमित शहा म्हणाले, शिवसेना एनडीएमध्ये कायम राहिल. टीडीपी स्वत:हून एनडीएबाहेर पडला. ओडिशात भाजपा आणि बीजेडीमध्ये थेट लढत होईल. कोलकात्यात तृणमूल काँग्रेसकडून भाजपवर हल्ले केले जात आहेत. स्वत:च अस्तित्व टिकवण्यासाठी त्यांची धडपड सुरू आहे, असे शहा म्हणाले.

शेतकरी आत्महत्यांमध्ये वाढ
कर्नाटक विधानसभा निवडणुकीत भाजपला बहुमत मिळेल. कर्नाटक निवडणुकीतील विजयाने भाजपसाठी दक्षिणेचे द्वार उघडेल. त्यामुळे ही निवडणूक भाजपासाठी महत्त्वाची आहे. काँग्रेसने गेल्या पाच वर्षांमध्ये कोणतीही कामे केलेली नाहीत. शेतकर्‍यांच्या आत्महत्यांमध्ये 173 टक्क्यांनी वाढ झाली आहे. भाजपचे सरकार आल्यास 10 दिवसांमध्ये शेतकर्‍यांचे 1 लाखांपर्यंतचे कर्ज माफ करण्यात येईल, असे आश्‍वासनही अमित शहा यांनी दिले.