न्यायालयाचा पुणे पोलिसांना धक्का; आनंद तेलतुंबडेंची अटक अवैध !

पुणे- भीमा-कोरेगाव हिंसाचार आणि नक्षलवाद्यांशी संबंध असल्याच्या आरोपावरून डॉ. आनंद तेलतुंबडे यांना पुणे पोलिसांनी आज शनिवारी सकाळी अटक केली होती. पुण्यातील सत्र न्यायालयाने काल त्यांचा अटकपूर्व जामीन अर्ज फेटाळला होता. त्यानंतर पुणे पोलिसांनी त्यांना अटक केली. मात्र, ही अटक अवैध असल्याचे विशेष न्यायालयाने म्हटलं आहे. न्यायालयाच्या या निर्णयामुळे पुणे पोलिसांच्या कारवाईला धक्का बसला आहे.

मुंबई विमानतळावर उतरताच पुणे पोलिसांकडून तेलतुंबडेंना अटक करण्यात आली. त्यानंतर, पुणे पोलिसांनी तेलतुंबडेंना पुण्याला नेले असून, आज न्यायालयात हजर करून त्यांच्या कोठडीची मागणी करण्यात येत होती. मात्र, येथील विशेष न्यायालयाने ही अटक अवैध असल्याचं म्हटलंय. पुणे पोलिसांना हा मोठा धक्का असून लवकरच तेलतुंबडेंची सुटका होण्याची शक्यता आहे.

आनंद तेलतुंबडे यांच्या अटकेवर दोन्ही बाजूंचा युक्तिवाद झाला. त्यांच्या बाजूने रोहन नहार यांनी युक्तिवाद केला. सर्वोच्च न्यायालयाने तेलतुंबडे यांना ४ आठवड्यांचे संरक्षण दिले असताना, ही अटक म्हणजे न्यायालाचा अवमान आहे, असे विशेष न्यायालयाने म्हटले आहे. तसेच हे संरक्षण ११ फेब्रुवारीपर्यंत कायम असल्याचेही न्यायलयाने स्पष्ट केले.

जिल्हा सरकारी वकील उज्ज्वला पवार यांनी यास विरोध केला. सर्वोच्च न्यायालयाच्या आदेशानुसार ४ आठवड्यात योग्य न्यायालयात जाऊन अटकपूर्व जामिनासाठी अर्ज करता येत होता. ज्यादिवशी त्यांनी हा अर्ज केला तेव्हाच, हे संरक्षण संपले. हा अर्ज फेटाळल्याने पोलिसांना अटक करता आली. त्यांनी अर्ज केला नसता तर पोलिसांनीही अटक केली नसती, असा युक्तिवाद उज्ज्वला पवार यांनी केला. परंतु, विशेष न्यायालयाने तेलतुंबडे यांची अटक अवैध ठरवली.