न्यूझीलंडलच्या लीओ कार्टरची विक्रमी खेळी; ६ चेंडूत सहा षटकार ठोकले !

वेलिंगटन: न्यूझीलंडलमध्ये सुरु असलेल्या सुपर स्मॅश ट्वेंटी-20 लीगमध्ये रविवारी विक्रमी खेळी क्रिकेट प्रेमींना पाहायला मिळाली. नाईट संघाच्या 219 धावांच्या अशक्य वाटणाऱ्या लक्ष्याचा कँटेरबरी किंग्स संघाने यशस्वी पाठलाग केला. या सामन्यात न्यूझीलंडच्या लीओ कार्टरची खेळी अविस्मरणीय राहिली. त्याने एका षटकात सहा षटकार खेचून क्रिकेट जगताच्या इतिहासात आपले नाव कोरले.

धावांचा पाठलाग करताना कार्टरने 16 व्या षटकात फिरकीपटू डेव्हसिचला चांगलेच धुतले. एका ओवरमध्ये ३६ धावांची खेळी करण्याची किमया त्याने साधली. कार्टरने 29 चेंडूंत एकूण 7 षटकार व 3 चौकार खेचून नाबाद 70 धावांची खेळी केली. त्याच्या या फटकेबाजीच्या जोरावर किंग्सने 18.5 षटकांत 3 बाद 222 धावा करून विजय मिळवला. त्याला सीजे बोवेस ( 57) आणि सीई मॅककोंचिइ ( 49*) यांनी दमदार साथ दिली. नाईटकडून टी सेईफर्ट ( 74) आणि सीजे ब्रॉवनली ( 55) यांनी फटकेबाजी केली.

यापूर्वी गॅरी सोबर्स ( वेस्ट इंडिज), रवी शास्त्री ( भारत), हर्षल गिब्स ( दक्षिण आफ्रिका), युवराज सिंग ( भारत), रॉस व्हाइटली ( इंग्लंड ) आणि हझरतुल्लाह जझाई ( अफगाणिस्तान) या पुरुष क्रिकेटपटूंनी एका षटकात सहा षटकार खेचण्याचा पराक्रम केला आहे. कार्टर याच्यासह युवराज, व्हाइटली आणि जझाई यांनी ट्वेंटी-20त ही फटकेबाजी केली.