न्यूझीलंड, ऑस्ट्रेलिया सामन्यादरम्यान स्टेडियमला लागली आग !

पर्थ: न्यूझीलंड आणि ऑस्ट्रेलियात सुरु असलेल्या कसोटी मालिकेतील पहिला सामना पर्थ येथे सुरु आहे. मार्नस लॅबुश्चॅग्नेनं शतकी खेळी करताना ऑस्ट्रेलियाला मजबूत स्थितीत आणले आहे. पण, हा सामना सुरू असताना पर्थ स्टेडियमच्या बाजूलाच असलेल्या बेलमोंट रेस कोर्सवर अचानक आग लागली आणि त्याच्या धुराचा लोट स्टेडियमभवती पसरला. त्यामुळे क्रिकेट चाहत्यांमध्ये गोंधळ उडाला.

ऑस्ट्रेलियाने नाणेफेक जिंकून प्रथम फलंदाजी करण्याचा निर्णय घेतला. वॉर्नर आणि जो बर्न्स यांना साजेशी सुरुवात करून देता आली नाही. बर्न्स 9 धावांवर कॉलीन डी ग्रँडहोमच्या गोलंदाजीवर माघारी परतला. त्यानंतर वॉर्नर व लॅबुश्चॅग्ने या जोडीनं डाव सावरण्याचा प्रयत्न केला. वॉर्नर 74 चेंडूंत 4 चौकार लगावताना 43 धावांत माघारी परतला. नील वॅगनरनं स्वतःच्याच गोलंदाजीवर वॉर्नरला झेलबाद केले. लॅबुश्चॅग्नेनं तिसऱ्या विकेटसाठी स्टीव्ह स्मिथसह शतकी भागीदारी केली. वॅगनरनं ही जोडी फोडली. त्यानं स्मिथला 43 धावांवर माघारी पाठवले.