पंतप्रधानांच्या पदवीची नव्याने होणार चौकशी

नवी दिल्ली । काही महिन्यांपूर्वी आम आदमी पक्षाने पंतप्रधान नरेंद्र मोदी यांच्या पदवी प्रकरणी रान उठविले होते. या अनुषंगाने आता पंतप्रधान नरेंद्र मोदींच्या डिग्री प्रकरणात केंद्रिय सूचना आयोग (सीआयसी) ने 1978चे डीयू रेकॉर्डच्या चौकशीचे आदेश दिले आहेत. सीआयसीने दिल्ली विद्यापीठातील 1978ला बीएची पदवी मिळवणार्‍या सर्व विद्यार्थ्याच्या रेकॉर्डच्या चौकशीचे आदेश दिले आहेत.

आयोगाने दिले आदेश
नीरज यांनी आरटीआयअंतर्गत 1978 मध्ये बीएची पदवी मिळवलेल्या विद्यार्थ्यांची संख्या, परीक्षेचा निकाल, क्रमांक, नाव, वडिलांचे नाव अशी माहिती मागवली होती. त्यावेळी विद्यापीठाच्या केंद्रीय जनसूचना अधिकार्‍याने ही विद्यार्थ्यांची व्यक्तिगत माहीत असल्याचे सांगत देण्यापासून नकार दिला होता. विद्यापीठाच्या केंद्रीय जनसूचना अधिकार्‍याने ही विद्यार्थ्यांची व्यक्तिगत माहिती असल्याचे केलेले अपील आयोगाने फेटाळले आहे. सीआयसीने विद्यापीठातून 1978ला बीए उत्तीर्ण झालेल्या सर्व विद्यार्थ्याचे रोल नंबर, नाव, वडिलांचे नाव, मिळालेले टक्क्यांसह सर्व माहिती देण्याचे आदेश दिले आहेत.

विद्यापीठ म्हणते पदवी वैध
आयोगासमोर सुनावणीदरम्यान सीपीआयओ मीनाक्षी सहाय्य म्हणाल्या, 1978मध्ये परीक्षेला बसलेल्या विद्यार्थांचे नाव, उत्तीर्ण, अनुतीर्णची माहिती देणे अवघड आहे. 1978ची परीक्षा डिजिटल स्वरूपातही झाली नसल्याचे त्या म्हणाल्या. दरम्यान, डीयू रजिस्ट्रार तरुण दासने गेल्या वर्षी सांगितले होते की, मोदींची पदवी खरी असल्याचे आम्हाला समजले, 1978मध्ये ते उत्तीर्ण झाले आणि 1979मध्ये त्यांनी पदवी संपादन केली.