पंतप्रधान नरेंद्र मोदीजी महिला अत्याचाराकडे लक्ष द्या : क्रिस्टिन लगार्ड
वॉशिंग्टन । भारतासारख्या देशात 8 वर्षाच्या मुलीवरील बलात्काराची घटना ही अत्यंत घृणास्पद असल्याचे सांगत भारताचे पंतप्रधान नरेंद्र मोदी यांच्यासहित सर्व भारतीय अधिकार्‍यांनी महिला अत्याचाराकडे लक्ष द्यावे, असे मत आंतरराष्ट्रीय नाणेनिधीच्या प्रमुख क्रिस्टिन लगार्ड यांनी व्यक्त केले.
जम्मू-काश्मीरच्या कठुआ आणि उत्तर प्रदेशातील उन्नाव येथील बलात्कारांच्या घटनांमुळे संपूर्ण देशात संतापाची लाट पसरलेली असतानाच आंतरराष्ट्रीय नाणेनिधीच्या प्रमुख क्रिस्टिन लगार्ड यांनी केलेल्या या विधानाला महत्त्व आले आहे. ‘भारतात जे काही होत आहे. ते घृणास्पद आहे. महिलांच्या सुरक्षेसाठी पंतप्रधान नरेंद्र मोदी लक्ष देतील, अशी मला आशा आहे,’ असे लगार्ड म्हणाल्या. त्यानंतर त्यांनी हे आयएमएफचे मत नसून, माझे व्यक्तिगत मत असल्याचेही स्पष्ट केले. ‘मागच्यावेळी मोदी दावोसला आले होते. तिथे त्यांचे भाषण झाले. या भाषणात त्यांनी महिलांचा पुरेसा उल्लेख केला नव्हता. हे मी त्यांच्या लक्षात आणून दिले होते,’ असेही त्यांनी यावेळी सांगितले.