पंतप्रधान मोदींना ग्रॅण्ड कॉलर!

पॅलेस्टाइन दौरा : परदेशी पाहुण्यांना दिला जाणारा सर्वोच्च सन्मान

रमाल्ला : भारत आणि पॅलेस्टाइनमध्ये परस्पर चांगले राजकीय संबंध राखण्यात महत्वाचे योगदान दिल्याबद्दल पंतप्रधान नरेंद्र मोदी यांना पॅलेस्टाइनचे राष्ट्राध्यक्ष महमूद अब्बास यांनी ग्रँड कॉलर ऑफ दि स्टेट ऑफ पॅलेस्टाइन या सर्वोच्च सन्मानाने सन्मानित केले. पॅलेस्टाइनमध्ये आलेल्या राजांना, देशाच्या किंवा सरकारांच्या प्रमुखांना तसेच त्यांच्या समकक्ष पद भूषवणार्‍या परदेशी पाहुण्यांना दिला जाणारा हा सर्वोच्च सन्मान आहे. पंतप्रधान नरेंद्र मोदी हे पॅलेस्टाइनला अधिकृत भेट देणारे पहिले भारतीय पंतप्रधान ठरले आहेत.

द्विपक्षीय बैठकीत चर्चा
पंतप्रधान नरेंद्र मोदी आणि पॅलेस्टाइनचे राष्ट्राध्यक्ष महमूद अब्बास यांच्यात झालेल्या द्विपक्षीय बैठकीदरम्यान मोदींना या सन्मानाने गौरविण्यात आले. द्विपक्षीय बैठकीत दोन्ही नेत्यांनी महत्वाच्या विषयावंर चर्चा केली. राष्ट्रपती महमूद अब्बास यांच्याबरोबर पत्रकार परिषदेला संबोधित करताना मोदींनी पश्‍चिम आशियात शांतता नांदेल, अशी भारताला अपेक्षा असल्याचे सांगितले. पॅलेस्टाइन जनतेच्या हितासाठी भारत कटिबद्ध असल्याचे मोदी म्हणाले. इस्त्रायलबरोबर शांतता संबंध प्रस्थापित होण्यासाठी आम्ही आंतरराष्ट्रीय स्तरावर भारताच्या भूमिकेवर अवलंबून आहोत असे पॅलेस्टाइनचे राष्ट्राध्यक्ष महमूद अब्बास यांनी सांगितले. यापूर्वी पॅलेस्टाइनकडून सौदी अरेबियाचे राजे सलमान, बहारिनचे राजे हमद, चीनचे राष्ट्राध्यक्ष शी जिनपिंग यांसारख्या राष्ट्रप्रमुखांना ग्रॅँड कॉलर या सर्वोच्च सन्मानाने गौरविण्यात आले आहे. या दौर्‍यादरम्यान, पंतप्रधान मंदिराची पायाभरणी कार्यक्रमाला हजेरी लावतील.

पंतप्रधान मोदींची ही चौथी भेट
या दौर्‍यात मोदींनी पॅलेस्टाइनचे दिवंगत राष्ट्रपती यसीर अराफात यांच्या कबरवर पुष्पांजली अर्पण केली. पॅलेस्टाइनच्या राष्ट्राध्यक्षांसोबत पंतप्रधान मोदींची ही चौथी भेट आहे. यापूर्वी या दोन्ही नेत्यांची भेट यूएनच्या जनरल असेंब्लीत 2015 मध्ये, पॅरिस क्लायमेट समिट 2016 मध्ये तर पॅलेस्टाइनचे राष्ट्राध्यक्ष भारत दौर्‍यावर आले होते, यावेळी त्यांच्या भेटी झाल्या आहेत. भारत मध्य आशियात शांतता प्रस्थापित करण्यासाठी महत्वाची भूमिका बजावू शकतो, असे पॅलेस्टाइनने मानले आहे.