पक्ष तिकीट देओ अथवा न देओ जनता पाठीशी

0

माजी मंत्री एकनाथराव खडसे ; निष्ठावंतांची अवहेलना होत असल्याची खंत

रावेर- विधानसभेतील माझ्या भाषणावर सरकार कडे एक चकार शब्द नाही, पक्ष टिकीट देओ अथवा न देओ जनताजनार्द माझ्या पाठीशी आहे. दुसर्‍या पक्षातील लोकांना तुम्ही मंत्रीपदाचे टिकिट देतात परंतु पक्षाकडून निष्ठावंतांची अवहेलना करण्याचे काम सुरू असल्याची टिका माजी मंत्री एकनाथराव खडसे यांनी रावेरमध्ये झालेल्या चिंतन बैठकीत केली. खडसेंच्या या वक्तव्यानंतर कार्यकर्ते, पदाधिकारी मात्र सुन्न झाले. भाजपाची विस्तृत व चिंतन बैठक रावेरमध्ये शुक्रवारी झाली.

तर तुम्हीदेखील एक दिवस बाजूला व्हाल : खडसेंचा सूचक इशारा
खडसे म्हणाले की, माझे मंत्रीपद गेल्यापासून मी आणलेले अनेक प्रकल्प रखडल्याने जिल्ह्याचे मोठे नुकसान झाले आहे. मी चाळीस वर्षापूर्वी लावलेले रोपटे मोठे झाले असून ते मी तोडनार नाही. मी जसा बाजूला झालो आहे तसे तुम्हीदेखील एक दिवशी बाजूला व्हाल, असा सूचक टोला खडसेंनी कुणाचेही नाव घेता लगावला. ते म्हणाले की, मी जनतेत राहणारा नेता असून जमिनीवर राहूनच काम केले आहे म्हणून मंत्रीपद गेल्यावर सुध्दा मला काहीच फरक पडलेला नाही. नुकसान झाले आहे माझ्या गरीब जनतेचे ! अश्या भावूक शब्दात रावेरमध्ये भाजपा कार्यकर्ते व पदाधिकार्‍यांनी त्यांनी मार्गदर्शन केले.

यांची होती बैठकीला उपस्थिती
या बैठकीला आमदार हरीभाऊ जावळे, जिल्हा परीषद उपाध्यक्ष नंदकिशोर महाजन, भाजपा संघटन सरचिटणीस प्रा.सुनील नेवे, सभापती माधुरी नेमाडे, उपसभापती अनिता चौधरी, जिल्हा परीषद सदस्य नंदा पाटील, रंजना पाटील, कैलास सरोदे, माजी शिक्षण सभापती सुरेश धनके, पंचायत समिती सदस्य धनश्री सावळे, कविता कोळी, योगीता वानखेडे, हर्षल पाटील, भाजपा तालुकाध्यक्ष सुनील पाटील, भाजपा सरचिटणीस महेश चौधरी, संजय गांधी निराधारचे अध्यक्ष शिवाजीराव पाटील, पद्माकर महाजन, शहराध्यक्ष मनोज श्रावगे आदींसह विविध गावांचे सरपंच, सदस्य, लोकप्रतिनीधी, भाजपा पदाधिकारी उपस्थित होते.