‘पतंजली’ च्या बनावट बेवसाईटवरून अनेकांना गंडा : बिहारमधील आरोपी जाळ्यात

जळगाव सायबर सेलची कामगिरी : राज्यातील अनेकांचा लाखोंचा गंडा घातल्याचा संशय

जळगाव : पतंजली एजन्सीची बनावट वेबसाईट बनवून जळगावसह राज्यातील अनेकांना लाखोंचा गंडा घालणार्‍या बिहारमधील महाठगास जळगाव सायबर सेलच्या पथकाने बिहार राज्यातील बिहारशरीफ गावातून मंगळवारी अटक केली आहे. नितीशकुमार नवलकिशोर प्रसाद (28, बिहारशक्ती, नांलदा, बिहार) असे अटकेतील आरोपीचे नाव आहे. आरोपीला घेवून पथक रवाना झाले असून गुरुवारी पहाटेपर्यंत ते जळगावात पोहोचणार असल्याचे सांगण्यात आले. भुसावळातील एकाला पतंजलीची एजन्सी व वस्तू देण्याच्या नावाखाली साडेतीन लाखात गंडवल्याप्रकरणी दाखल गुन्ह्यात आरोपीला अटक करण्यात आली.

भुसावळातील एकाला साडेतीन लाखात गंडवले
भुसावळातील रहिवासी सागर बत्रा यांना पतंजलीची एजन्सी हवी असल्याने त्यांनी इंटरनेटवरून पतंजलीच्या वेबसाईटवर संपर्क साधला. यावेळी आरोपी नितीनशकुमार यांच्याशी संपर्क झाल्यानंतर त्यांनी वेळोवेळी डेअरी प्रॉडक्टस तसेच जीएसटी भरण्याच्या नावाखाली एकूण साडेतीन लाख रुपये उकळले मात्र वस्तू मिळत नसल्याने बत्रा यांना फसवणूक झाल्याचे लक्षात आल्याने त्यांनी जळगाव सायबर सेलकडे तक्रार नोंदवली. या प्रकरणी 4 डिसेंबर 2018 रोजी गुन्हा दाखल करण्यात आला.

बनावट बेवसाईट बनवणार्‍या ठगांना अटक
सायबर सेलच्या तपासात आरोपी अजयकुमार व सुमनकुमार (पटना, बिहार) यांनी पतंजलीची बनावट वेबसाईट बनवल्याचे निष्पन्न झाले. या प्रकरणी यापूर्वीच दोघांना अटक करण्यात आली होती तर आरोपी सध्या जामिनावर बाहेर आहेत. दोघाही आरोपींचे एमसीए व डीसीए शिक्षण झाले असून अजयकुमारने वेबसाईट बनवत ती सुमनमकुमारला होस्टींगसाठी दिली तर नंतर आरोपी नितीशकुमारने त्या माध्यमातून ग्राहकांशी संपर्क साधत लाखोंची रक्कम उकळली.

खबर्‍यांनी नाकारले पैसे ः म्हणून आवळता आल्या मुसक्या
फसवणुकीच्या गुन्ह्यात आरोपी नितीशकुमारचे नाव निष्पन्न झाले असलेतरी दोन वेळा पथक गेल्यानंतरही तो हाती लागत नव्हता. अखेर स्थानिक खबर्‍यांना आमिष दाखवून आरोपी घरी आल्यानंतर टीप द्यावी, असे सांगितल्यानंतर खबरे पाळत ठेवून होते. आरोपी सोमवारपासून घरात असल्याची माहिती जळगाव सायबर सेलला मिळाल्यानंतर पथक ट्रेनने मुंबई व तेथून विमानाने बिहारात रवाना झाले. आरोपी राहत असलेल्या बिहारशरीफ भागातून त्याच्या गोपनीय पद्धत्तीने मुसक्या आवळण्यात यश मिळाले. यावेळी पथकाने खबर्‍यांना बक्षीस देवू केले मात्र त्यांनी ते नम्रपणे नाकारले.

यांनी आवळल्या मुसक्या
जिल्हा पोलिस अधीक्षक पंजाबराव उगले, अपर पोलिस अधीक्षक भाग्यश्री नवटके यांच्या मार्गदर्शनाखाली जळगाव सायबर सेलचे पोलिस निरीक्षक दत्तात्रय परदेशी यांच्या नेतृत्वात उपनिरीक्षक अंगद नेमाणे, हवालदार प्रवीण वाघ, नाईक दिलीप चिंचोले यांच्या पथकाने आरोपीला बिहारशक्तीमधून अटक केली. गुरुवारी पहाटेपर्यंत हे पथक आरोपीला घेवून जळगावात येत असल्याचे सूत्रांनी सांगितले.

आरोपींनी जमवली लाखोंची माया
समजलेल्या माहितीनुसार, आरोपीने राज्यातील अनेकांना ठगवले असून या माध्यमातून लाखोंची माया जमवली आहे. पोलिस तपासात या बाबी उघड होणार असून आरोपींनी मुंबईसह अन्य भागातून काहींना गंडवल्याचीदेखील माहिती आहे. आरोपीचा एक साथीदारदेखील या गुन्ह्यात सहभागी असून पथकाने मात्र त्याबाबत तपासाच्या दृष्टीने गोपनीयता पाळली आहे.