पत्नीच्या अनैतीक संबंधाला वैतागून पतीची आत्महत्या

नर्‍हे । पत्नीच्या अनैतीक संबंधांना वैतागून पतीने गळफास घेऊन आत्महत्या केल्याची घटना 17 जुलै रोजी नर्‍हे येथे घडली होती. आत्महत्येस प्रवृत्त केल्याप्रकरणी सिंहगड पोलीस ठाण्यात तिघांविरुद्ध गुन्हा दाखल झाला असून पोलीस त्यांचा शोध घेत आहेत.

प्रवीण ज्ञानेश्वर निंबाळकर (वय 39) असे मृताचे नाव आहे. याप्रकरणी पत्नी शामल निंबाळकर, नितीन भोईत (रा. वाघोली), गणेश सुखदेव रनवरे यांच्या विरुद्ध गुन्हा दाखल करण्यात आला आहे. प्रवीण आणि शामल यांचा विवाह 2006 मध्ये झाला होता. लग्नानंतर शामलचे नितीन आणि गणेश यांच्याबरोबर अनैतीक संबंध असल्याची माहिती प्रवीणला मिळाली. त्यावेळी नातेवाईकांनी तिला समजावण्याचा प्रयत्न केला. प्रवीणने देखील तिला समजावून सांगितले. परंतू त्याचा तिच्यावर काही परिणाम झाला नाही. याच नैराश्येतून प्रवीणने राहत्या घरात गळफास घेऊन आत्महत्या केली. या घटनेपासून शामल, नितीन आणि गणेश फरार आहेत. त्यांच्या शोधासाठी पथक रवाना केले असल्याचे सिंहगड रोड पोलिसांनी सांगितले.