पत्नीच्या मानसिक त्रासामुळे पतीची आत्महत्या

पिंपरी :पत्नी आणि सासरच्या मंडळींच्या त्रासाला कंटाळून तरुणाने गळफास घेऊन आत्महत्या केली. कासारसाई येथे शनिवारी (१८ ऑगस्ट) रात्री हा प्रकार घडला. यावरून पत्नी आणि सासरच्या लोकांविरोधात आत्महत्येस प्रवृत्त केल्याप्रकरणी गुन्हा दाखल करण्यात आला आहे.

त्यानुसार सिद्धी गाडेकर, गणेश रामदास थोरवे, अनिल सोपान थोरवे (सर्व रा. कासारसाई, ता. मुळशी) यांच्या विरोधात गुन्हा दाखल करण्यात आला आहे. लक्ष्मी महादेव गाडेकर (३९, रा. कसरसाई, ता. मुळशी) यांनी या प्रकरणी हिंजवडी पोलिस ठाण्यात फिर्याद दिली आहे  नितीन महादेव गाडेकर (२६, रा. कासारसाई, ता. मुळशी) असे गळफास घेऊन आत्महत्या केलेल्याचे नाव आहे.

पोलिसांनी दिलेल्या माहितीनुसार, जून २०१७ मध्ये सिद्धी व नितीन यांचे लग्न झाले. लग्नानंतर सिद्धी आणि नितीन यांच्यामध्ये वारंवार किरकोळ कारणांवरून भांडण होत होते. सततच्या भांडणाला कंटाळून सिद्दी माहेरी राहत होती. यावरून सिद्धीचे वडील गणेश आणि त्यांचे बंधू अनिल यांनी नितीनला वारंवार फोन करून मानसिक त्रास दिला. तसेच तुम्हाला कासारसाईमध्ये राहू देणार नाही, अशी धमकीही दिली. या त्रासाला कंटाळून नितीन याने शनिवारी राहत्या घरी नायलॉनच्या दोरीने गळफास घेऊन आत्महत्या केली. यावरून पत्नी सिद्धी आणि इतर नातेवाइकांवर गुन्हा दाखल करण्यात आला आहे. हिंजवडी पोलिस ठाण्याचे सहाय्यक निरीक्षक नकुल न्यामणे तपास करीत आहेत.