पत्रकाराला धावत्या लोकलमधून खाली फेकण्याचा प्रयत्न

मुंबई । मुंबईची लाइफलाइन असलेल्या लोकल ट्रेनमध्ये वाढती गुंडगिरी दिवसेंदिवस वाढतच चालली आहे. याबाबत अनेकदा तक्रारी करूनही या गुंडगिरीला आळा बसलेला नाही. त्याचा फटका सर्वसामान्य नागरिकांना बसतोच त्याचबरोबर याचा फटका आता पत्रकारांनाही बसला आहे. मुंबईतील ज्येष्ठ पत्रकार सुधीर शुक्ला हेही बुधवारी सकाळी याच गुंडगिरीला बळी ठरले. शुक्ला हे नामांकीत हिंदी न्यूज चॅनलचे वरिष्ठ पत्रकार सुधीर शुक्ला हे अंधेरीला जाण्यासाठी मीरा रोड स्थानकात लोकल ट्रेनची प्रतीक्षा करत होते. लोकल येताच त्यांनी गाडी पकडण्याचा प्रयत्न केला. परंतु, गाडीत चढत असताना दरवाजाजवळ उभ्या असलेल्या घोळक्याने त्यांना गाडीत चढण्यास मज्जाव केला. तरी, सुधीर शुक्ला आणि इतर काही प्रवासी गाडीत चढले. लोकल मीरा रोड स्थानकावरून सुटल्यावरही घोळक्याची अरेरावी सुरूच होती. त्यांनी पत्रकार आणि इतरांना शिवीगाळ करण्यास सुरुवात केली. प्रकरण हाताबाहेर जात असल्याचे लक्षात येताच सुधीर यांनी मध्यस्थी करण्याचा प्रयत्न केला. पण, या घोळक्यातील काहीजण शुक्ला यांनाच दमदाटी करू लागले.

लोकलमधील गुंडगिरीविरोधात पोलीस निष्क्रिय
लोकलमध्ये गुंडगिरीचा हा पहिलाच प्रकार नाही. याआधीही अशा बर्‍याच घटना घडल्या आहेत. विरार ते दादर या ट्रेनमधूनही मोठ्या प्रमाणात अशा प्रकारचे घोळके पाहायला मिळतात. असे ग्रुप ट्रेनमध्ये पत्ते खेळण्यापासून, मोठ-मोठ्याने गाणी म्हणणं, धक्काबुक्की करणं, बवरून भांडणं, अशा सर्वच प्रकारची गुंडगिरी करून सामान्य प्रवाशांना त्रास देत असल्याचे वारंवार समोर आले आहे. तरीही रेल्वे प्रशासन अशा गुंडगिरी करणार्‍यांवर कधी आणि काय कारवाई करणार, हे अजूनही स्पष्ट झालेले नाही.

हत्या करणारा गुन्हा दाखल
सुधीर शुक्ला यांनी धक्काबुक्की करत असलेल्या व्यक्तींचे फोटो काढण्याचा प्रयत्न केला. याची कुणकुण घोळक्याला लागली आणि त्यांनी शुक्ला यांना मारहाण करण्यास सुरुवात केली. त्यांच्या डोक्यातून रक्त येईपर्यंत या गुंडांनी त्यांना मारहाण केली. एवढ्यावरच न थांबता त्यांनी शुक्ला यांना दरवाज्याजवळ नेत त्यांची कॉलर पकडून त्यांना दरवाजाजवळ लटकवले. सुदैवाने, सुधीर शुक्ला यांनी खांबाला घट्ट पकल्याने ते खाली पडले नाहीत. दरम्यान, या प्रकरणी अंधेरीच्या जीआरपीत हत्येचा प्रयत्न आणि दरोड्याचा गुन्हा नोंद करण्यात आला आहे. शिवाय, मुंबई क्राइम रिपोर्टर्स असोसिएशनने या घटनेचा निषेध नोंदवला असून आरोपींवर कठोर कारवाई करण्याची मागणी केली आहे.