‘पद्मावती’मधील शाहिदच्या लूकची इंटरनेटवर चर्चा

मुंबई । संजय लीला भन्सालीच्या ‘पद्मावती’ सिनेमातील दीपिका पादुकोणचा लूक अनेकांना आवडला. आता शाहिद कपूर त्याच्या लूकमुळे इंटरनेवर चर्चेत आहे. दीपिकाच्या लूकनंतर आता सिनेमात महारावल रतन सिंहची व्यक्तिरेखा साकारणार्‍या शाहिद कपूरचा लढवय्या लूक समोर आला आहे. शाहिद कपूरने ट्विटरवर आपला शानदार लूक शेअर केला आहे. हा फोटो शेअर करताच नेटिझन्सच्या प्रतिक्रिया येण्यास सुरुवात झाली आहे. शाहिदचा अंदाज अनेकांना आवडत आहे.

शाहिदचा लूक अद्भुत असल्याचे चाहत्यांनी म्हटले आहे. हा लूक ‘पद्मावती’च्या शानदार पोस्टरपैकी एक असल्याचे काही जण म्हणाले, तर काहींनी शाहिदच्या इन्टेन्स लूकचे कौतुक केले. काही व्यक्तिरेखा मनात घर करतात, ही (महारावल रतन सिंह) त्यापैकी एक असेल, अशी प्रतिक्रिया काहींनी दिली. विशेष म्हणजे ‘पद्मावती’ चित्रपट पुढील वर्षी एप्रिल महिन्यात रिलीज होणार असल्याच्या चर्चा होत्या. परंतु चाहत्यांना आनंदाचा धक्का देत यावर्षीच हा सिनेमा प्रदर्शित करण्याचे भन्सालींनी जाहीर केले आहे. 1 डिसेंबर 2017 रोजी ‘पद्मावती’ सिनेमागृहांमध्ये झळकेल.

रणवीर अल्लाउद्दीन खिल्जीच्या भूमिकेत
‘पद्मावती’ चित्रपटात रणवीर सिंह अल्लाउद्दीन खिल्जीच्या भूमिकेत आहे, तर शाहिद कपूर राजा रतन सिंह म्हणजे राणी पद्मिनीच्या पतीच्या भूमिकेत आहे. अदिती राव हैदरीही या चित्रपटात झळकणार आहे. रणवीर सिंह पहिल्यांदाच खलनायकाची व्यक्तिरेखा साकारणार आहे. गोलियोंकी रासलीला-रामलीला, बाजीराव मस्तानी या चित्रपटांनंतर दीपिका-रणवीर ही जोडी तिसर्‍यांदा ऑनस्क्रीन एकत्र दिसणार आहे.