परळीत पंकजाताईंना धनुभाऊंचा दणका

परळी । परळी बाजार समितीच्या निवडणुकीचा निकाल लागला आहे. मुंडे बंधु-भगिनीसाठी प्रतिष्ठेची ठरलेल्या या निवडणुकीत राज्याच्या ग्रामविकास मंत्री पंकजा मुंडे यांचा दारूण पराभव झाला आहे. तर विधानपरिषदेचे विरोधी पक्षनेते आणि राष्ट्रवादी काँग्रेसचे नेते धनंजय मुंडे यांचा मोठा विजय झाला आहे. या निकालामुळे परळीत बहिण पंकजा मुंडे यांना भाऊ धनंजय मुंडे यांनी दणका देत सरशी मिळवल्याची चर्चा सुरू आहे.

परळी बाजार समिती निवडणुकीत धनंजय मुंडेंनी बाजी मारली आहे. या निवडणुकीत राष्ट्रवादी काँग्रेसने 18 पैकी 14 जागा जिंकत भाजपचा दारुण पराभव केला आहे. तर भाजपला केवळ 4 जागांवर समाधान मानावे लागले आहे. परळी कृषी उत्पन्न बाजार समितीच्या 18 जागांसाठी 42 उमेदवार रिंगणात होते.

दरम्यान, जिल्हा परिषद निवडणुकीत सर्वाधिक सदस्य निवडून आले असतानाही सुरेश धस यांच्या बंडखोरीमुळे सत्ता स्थापन करण्यास राष्ट्रवादीला अडचण निर्माण झाली होती. तेव्हा जिल्हा परिषदेच्या सर्व राजकारणामागे पंकजा मुंडे असल्याचे बोलले जात होते. याच सर्व प्रकाराचा धनंजय मुंडे यांनी परळी बाजार समितीत बदला घेतला आहे.

गेल्या तीस वर्षांपासून परळी बाजार समिती दिवंगत गोपीनाथ मुंडे यांच्याच ताब्यात होती. गोपीनाथ मुंडे यांच्या नेतृत्वाखाली त्यांचे मोठे बंधू पंडितअण्णा मुंडे हेच या बाजार समितीचा कारभार बघायचे. पंडित अण्णांनी बंडखोरी केल्यानंतर या बाजार समितीवर धनंजय मुंडेंनी एक हाती अंमल ठेवला होता. आता तीच परळी बाजार समिती पुन्हा एकदा धनंजय मुंडे यांच्या हातात आली आहे. तसेच गेल्या सहा महिन्यांत परळीत तीन वेगवेगळ्या निवडणुका झाल्या. या तिन्ही निवडणुकांमध्ये धनंजय मुंडेंनीच बाजी मारली आहे. यामुळे बाजार समितीच्या निवडणुकीतील त्यांचा हा विजय म्हणजे विजयाची हॅट्ट्रीक असल्याचे म्हटले जात आहे.