पर्रीकरांवर पिंपरी-चिंचवडकर नाराज

पिंपरी-चिंचवड । मनोहर पर्रीकर यांनी संरक्षणमंत्रीपद सोडून गोव्याचे मुख्यमंत्रीपद स्वीकारल्यामुळे पिंपरी-चिंचवडचे नागरिक नाराज झाले आहेत. मनोहर पर्रिकर संरक्षणमंत्री असतानाच्या काळातच पिंपरी चिंचवडमध्ये बोपखेल गावाच्या रस्त्याचा मुद्दा गाजला होता.

पिंपरी चिंचवड महापालिकेने आणि बोपखेलवासीयांनी या रस्त्याचा पाठपुरावा करत थेट संरक्षण मंत्रालय गाठले होते. त्यानंतर मनोहर पर्रीकरांनी यासंदर्भात अनेक बैठकही घेतल्या. त्यामुळे हा रस्ता पुन्हा सुरू होण्याची भाबडी आशा बोपखेलवासी बाळगून होते.

मनपा निवडणुकीपूर्वी बोपखेल रक्षक चौक रस्त्याचा प्रश्न निकाली निघणार असा दावाही केला गेला. प्रश्‍न अंतिम टप्प्यात आहे असे सर्वांनाच वाटले होते. पण तेवढ्यात गोव्यात पर्रिकर परतले आणि बोपखेल रस्त्याचा प्रश्‍न जैसे थेच राहीला. हा रस्ता होण्याचा दावा पदाधिकारी करत असले, तरी हा प्रश्‍न तूर्तास तरी खोळंबणार यात शंकाच नाही.