पवना धरणातून 2867 क्युसेक वेगाने पाण्याचा विसर्ग

नदीकाठच्या गावांना सतर्कतेचा इशारा

पिंपरी-चिंचवड : गेल्या 24 तासांत पवना धरण परिसरात सुरू असलेल्या जोरदार पावसामुळे पवना धरणातून बुधवारी सकाळपासून 2867 क्युसेक या वेगाने पाणी सोडण्यास सुरुवात केली आहे. त्यामुळे पवना नदी दुथडी भरून वाहू लागली आहे. नदीकाठच्या गावांना सतर्कतेचा इशारा देण्यात आला आहे. यंदा सुरुवातीपासूनच पाऊस चांगला पडल्यामुळे पिंपरी-चिंचवडकरांची तहान भागविणारे पवना धरण जुलैअखेरीस 100 टक्के भरले आहे. काही दिवस विश्रांती घेतल्यानंतर गेल्या दोन दिवसांपासून पावसाचे जोरदार पुनरागमन झाले आहे. गेल्या 24 तासात धरण परिसरात जोरदार पाऊस सुरू आहे. 24 तासांतच 63 मिमी पावसाची नोंद झाली आहे. एक जूनपासून धरण परिसरात 3374 मिमी पाऊस आहे.

पाणी सोडण्याचा वेग कमी-जास्त होणार
हायड्रो पॉवर आऊटलेटद्वारे बुधवारी पहाटे पाचपासून 1400 क्युसेक या वेगाने नदीत पाणी सोडण्यास सुरुवात करण्यात आली होती. परंतु, पुन्हा पावसाचा जोर वाढल्याने आता 2867 क्युसेक वेगाने नदीपात्रात पाणी सोडण्यात येत आहे. पावसाची परिस्थिती पाहून पाणी सोडण्याचा वेग कमी-जास्त केला जाणार आहे, अशी माहिती अभियंता मनोहर खाडे यांनी दिली. पाऊस सुरूच राहिला तर पवना नदीतील पाण्याची पातळी वाढू शकते. यामुळे नदीकाठच्या नागरिकांना सतर्कतेचा इशारा देण्यात आला आहे.

जुलैअखेरच धरण भरले
दरम्यान, दरवर्षी पवना धरण 15 ऑगस्टपर्यंत भरते. परंतु, पिंपरी-चिंचवड महापालिकेने यंदा 2 मेपासून पाणीकपात केली होती. त्यामुळे 1 जून रोजी धरणात 20.28 टक्के इतका पाणीसाठी शिल्लक होता. त्यातच यंदा सुरुवातीपासूनच पाऊस चांगला झाल्याने जुलैअखेर धरण 100 टक्के भरले. आता पुन्हा धरण परिसरात जोरदार पाऊस सुरू असल्याने धरणातून मोठ्या प्रमाणावर पाण्याचा विसर्ग सुरू आहे.