पश्‍चिम महाराष्ट्रात डान्स बार सुरू केल्यास आंदोलन
राष्ट्रवादी काँग्रेस सांस्कृतिक विभागाचा इशारा
पुणे : महाराष्ट्रात पुन्हा एकदा डान्सबारचा मार्ग मोकळा झाला आहे. मुंबईतील डान्स बारबाबत महाराष्ट्र सरकारने केलेल्या कायद्याबद्दल सर्वोच्च न्यायालयाने दिलेल्या निर्णयाने हे सिद्ध झाले आहे. या निर्णयानुसार रात्री 11.30 वाजेपर्यंत डान्सबार खुले ठेवण्यास परवानगी देण्यात आली आहे. पश्‍चिम महाराष्ट्रातदेखील डान्स बार बंदी हटवून ते परत सुरू करण्याचा निर्णय सरकारने घेतल्यास तीव्र आंदोलन करण्याचा इशारा पश्‍चिम महाराष्ट्रातील राष्ट्रवादी काँग्रेस साहित्य, कला व सांस्कृतिक विभागाने दिला आहे.
सरकारच्या या निर्णयाबाबत पश्‍चिम महाराष्ट्र राष्ट्रवादी काँग्रेस साहित्य, कला व सांस्कृतिक विभागाचे अध्यक्ष सनी मानकर यांनी तीव्र नाराजी व्यक्त केली आहे. आर. आर. पाटील यांनी डान्सबार बंदीचा चांगला निर्णय घेतला होता. तसा कायदादेखील केला गेला. मात्र, आताच्या सरकारने ही बंदी उठवली. या बंदी उठवण्याने युवक, महिला वर्गाचे बरेच नुकसान होणार आहे. आत्तापर्यंत या डान्सबारमुळे अनेक संसार उद्धवस्त झाले आहेत. युवक वर्गात गुन्हेगारीचे प्रमाण वाढण्याची भीती मानकर यांनी व्यक्त केली आहे. हे सरकार पैशांच्या मागे लागून अशाप्रकारचा निर्णय घेत आहे हे खेदजनक असल्याचे त्यांनी सांगितले.