पहूर पेठ, कसबे परिसरातही कोरोनाचा संसर्ग वाढला

जामनेर/पहूर। तालुक्यातील पहुर पेठ, पहुर कसबे परिसरातही संसर्ग वाढत आहे.तसेच काही मृत्यूची नोंद सुद्धा झाली आहे. त्याची दखल घेऊन तालुका वैद्यकीय अधिकारी डॉ. राजेश सोनवणे यांनी पहुर येथे भेट दिली. पहुर येथे वैद्यकीय पथकाने डॉ.जितेंद्र जाधव, डॉ. जितेंद्र वानखेडे यांच्या मार्गदर्शनाखाली सर्वेक्षण केले. संशयितांच्या कोरोना चाचण्या घेण्यात आल्या. पेठ व कसबे दोन्ही ग्रा.पं.च्या व लोकप्रतिनिधी मदतीने सर्व व्यावसायिक दुकानदार, खासगी डॉक्टर त्यांच्या दवाखान्यात काम करणारे व्यक्ती, खासगी व सरकारी दवाखान्यात येणारे सर्व रुग्ण, भाजीपाला विक्रेते, सलून दुकानदार आदींची कोरोना चाचणी रविवार व सार्वजनिक सुट्टीचे दिवस वगळता दररोज ग्रामीण रुग्णालय पहुर येथे दुपारी बारा वाजता करण्यात येणार आहे. कोरोना चाचणी केल्यानंतरच त्यांना व्यवसाय परवानगी देण्यात येणार आहे.

पहुर येथील एक खासगी डॉक्टर यांनी पॉझिटिव्ह आल्यानंतरही रुग्ण तपासणी केल्याची माहिती तालुका वैद्यकीय अधिकारी यांना मिळाली. त्यानुसार त्यांनी चौकशीचे आदेश दिले. अशी घटना खरोखरच घडली असेल तर संबंधित डॉक्टरांचे नाव जिल्हाधिकार्‍यांना कळवून त्यांच्या विरोधात साथरोग नियंत्रण कायद्यांतर्गत कारवाई करण्यात येईल, असे डॉ.राजेश सोनवणे यांनी सांगितले.
तसेच नागरिकांनी मास्क, वारंवार हात धुणे, गर्दी न करता एकमेकांपासून अंतर ठेवावे व किरकोळ आजाराची लक्षणे दिसून आल्यास तात्काळ कोरोना चाचणी करून पुढील उपचार करावे म्हणजे रुग्णाचा धोका कमी होतो, असे त्यांनी सांगितले.

ग्रामीण रुग्णालय पहुर येथे लवकरच कोरोना लसीकरण केंद्र सुरू करण्याबाबत जिल्हा शल्य चिकित्सक यांना कळविण्यात येणार आहे. तालुक्यातील सर्व प्राथमिक आरोग्य केंद्रात 60 वर्षे आणि 45 वर्षेवरील कोमॉरबीड नागरिकांना ऑनलाईन रजिस्ट्रेशन केल्यानंतर लसीकरण करण्यात येणार असल्याची माहिती तालुका आरोग्य अधिकारी डॉ.राजेश सोनवणे यांनी माहिती दिली.