पाकने आणखी तिघांना हेरगिरीच्या संशयावरून पकडले

नवी दिल्ली : रॉ एजंट असल्याच्या संशयावरून तिघांना पाकव्याप्त काश्मीरमध्ये अटक करण्यात आल्याचे वृत्त आहे. पाकिस्तानच्या ‘डॉन’ या दैनिकाने हे वृत्त दिले आहे. पाकिस्तानविरोधी कारवाया केल्याच्या संशयावरून त्यांना अटक केल्याचे स्थानिक पोलिसांनी म्हटले आहे.

खलिल, इम्तियाज आणि रशिद
नुकतेच पाकिस्तानने ‘रॉ’चे हेर असल्याच्या आरोपावरून भारतीय नौदलाचे माजी अधिकारी कुलभूषण जाधव यांना दोषी ठरवत मृत्युदंडाची शिक्षा ठोठावली होती. मात्र, भारताने पाकिस्तानचा हा दावा फेटाळून लावला होता. त्यानंतर लगेचच हे प्रकरण घडले आहे. मोहम्मद खलिल, इम्तियाज आणि रशिद अशी त्यांची नावे आहेत. स्थानिक पोलिसांनी या तिघांना चेहरे झाकून पत्रकार परिषदेत हजर केले होते. तिघेही अब्बासपूरमधील टरोटी गावचे राहणारे आहेत.

बॉम्बस्फोटाचा आरोप
सप्टेंबर महिन्यात अब्बासपूर येथील पोलीस स्टेशनबाहेर झालेल्या बॉम्बस्फोटातही तिघांचाही समावेश होता. या तिघांनी मिळून पोलीस स्टेशनच्या परिसरात आयईडी स्फोटके ठेवली. या कामगिरीसाठी खलीलला पाच लाख रूपये देण्यात आले होते. तपास करत असताना पोलिसांना खलिल आणि त्याच्या साथीदारांचा समावेश असल्याचे आढळून आले. एका व्यक्तीने स्फोटाच्या दिवशी या तिघांना बॅग घेऊन अब्बासपूरमध्ये पाहिल्याचे सांगितले होते. त्याआधारे पोलिसांनी कारवाई करत या तिघांना ताब्यात घेतले. या तिघांवरही दहशतवादविरोधी कायदा आणि स्फोटक कायद्याखाली आरोप ठेवण्यात आले आहेत, असे पोलिसांनी सांगितले.

‘रॉ’शी संबंध
मुख्य संशयित खलिल नोव्हेंबर 2014 मध्ये काश्मीरमध्ये नातेवाईकांना भेटण्यासाठी गेला होता. याठिकाणी तो ‘रॉ’च्या अधिकार्‍यांच्या संपर्कात आला होता. त्यांनी खलिलला ‘रॉ’च्या कामात सामील करून घेतले. इंट्रा- काश्मीर ट्रॅव्हल परमिट मिळवल्यानंतर खलिलने ‘रॉ’साठी काम सुरू केले. पाकिस्तानमध्ये परतल्यानंतर खलिलने इम्तियाज आणि रशीद यांनादेखील साथीला घेतले. अनेकदा एलओसी पार केल्याची कबुली खलीलने पोलिसांनी दिल्याचे स्थानिक पोलिसांनी या पत्रकारा परिषदेत सांगितले.