पाकला आणखी एक धक्का!

सुरक्षा सहाय्यही नाकारले

वॉशिंग्टन : काही दिवसांपूर्वीच पाकिस्तानला आर्थिक मदत न देण्याच्या निर्णय घेतल्यानंतर ट्रम्प प्रशासनाने पाकला आणखी एक धक्का दिला आहे. पाकिस्तानकडून दहशतवादी संघटनांविरोधात ठोस कारवाई होणार नाही तोपर्यंत आम्ही पाकिस्तानला पुरवण्यात येणारी सुरक्षा मदत थांबविण्याचा निर्णय घेतल्याची माहिती अमेरिकन परराष्ट्र मंत्रालयाच्या प्रवक्त्या हीथर नोर्ट यांनी दिली. नोर्ट म्हणाल्या, पाकिस्तान जोपर्यंत तालिबानी दहशतवादी संघटना, हक्कानी नेटवर्क यांसारख्या अशांतता पसरवणार्‍या आणि अमेरिकन लोकांना इजा पोहोचवणार्‍या घटकांविरोधात निर्णायक कारवाई करणार नाही, तोपर्यंत अमेरिका पाकला कोणतेही सुरक्षा सहाय्य पुरवणार नाही. या अंतर्गत ट्रम्प सरकार पाकिस्तानला देण्यात येणारी आर्थिक मदत थांबवू शकते. मात्र, रक्कम सरकारला अन्य ठिकाणी वळवता येणार नाही. जेणेकरून परिस्थिती सुधारल्यानंतर या निधीचा पुन्हा वापर करता येईल, असे हीथर नोर्ट यांनी सांगितले.

पाककडून दहशतवादी संघटनांना अभय
हीथर नोर्ट म्हणाल्या, अमेरिका आणि पाकिस्तानमध्ये उच्चस्तरीय बैठकाही झाल्या. तरीदेखील तालिबान आणि हक्कानी नेटवर्कसारख्या संघटनांकडून अफगाणिस्तान परिसरात अशांतता पसरवली जात आहे. पाकिस्तानकडून मिळणारे अभय यासाठी कारणीभूत आहे. त्यामुळे या संघटना अमेरिकन लोक आणि त्यांच्याशी संबंधित व्यक्तींना लक्ष्य करत आहेत. दहशतवादामुळे पाकिस्तानचेही मोठे नुकसान होत आहे. येथील सुरक्षा यंत्रणा अल-कायदा, आयसिस आणि तालिबानी यांसारख्या संघटनांशी प्रभावीपणे लढाही देत आहेत. मात्र, आता अमेरिका आणि पाकिस्तानने एकत्र येत याविरुद्ध लढा देण्याची गरज आहे.