पाकसोबत न खेळण्याच्या निर्णय बाळासाहेबांच्या विचारांचा विजय

मुंबई : पाकिस्तानसोबत क्रिकेट खेळण्यास परराष्ट्र मंत्री सुषमा स्वराज यांनी कडाडून विरोध केल्याच्या भूमिकेचे परिवहन दिवाकर रावते यांनी स्वागत केले. पाकिस्तानसोबत क्रिकेट न खेळण्याच्या निर्णयाला संसदेच्या परराष्ट्र व्यवहारविषयक सल्लागार समितीने परराष्ट्र मंत्र्यांच्या या निर्णयास मान्यता दिली आहे. शिवसेनाप्रमुख बाळासाहेब ठाकरे हे पाकिस्तानसमवेत क्रिकेट खेळण्यास सातत्याने विरोध करीत होते. संसदीय समितीने आज एकप्रकारे शिवसेनाप्रमुखांच्याच विचारास मान्यता दिली असून त्याबद्दल मी परराष्ट्र मंत्री सुषमा स्वराज यांच्याबरोबर संसदीय समितीचे अभिनंदन करतो, अशी प्रतिक्रिया परिवहन मंत्री दिवाकर रावते यांनी जनशक्तिशी बोलताना दिली आहे.

रावते म्हणाले की, शिवसेनाप्रमुख बाळासाहेबांनी पाकिस्तानशी क्रिकेट खेळण्यास तसेच इतर कोणत्याही प्रकारचे संबंध ठेवण्यास नेहमीच विरोध केला आहे. दहशतवादी कारवायांच्या मागे पाकिस्तानचा हात असल्याचे वारंवार सिद्ध झाले आहे. त्या पार्श्वभूमीवर पाकिस्तानशी क्रिकेट न खेळण्यासंदर्भात परराष्ट्रमंत्र्यांसह संसदीय समितीने ठामपणे निर्णय घेतला. या माध्यमातून संसदीय समितीने शिवसेनाप्रमुखांच्याच विचारास मान्यता दिली आहे. समितीच्या या निर्णयाबद्दल आपणास अभिमान वाटत असल्याचे सांगत रावते यांनी हा निर्णय होण्यासाठी ठामपणे भूमिका मांडल्याबद्दल स्वराज यांचे अभिनंदन केले.