पाकिस्तानात कोरोनाचा कहर; इम्रान खान यांच्यावर दयेची भीक मागण्याची वेळ

नवी दिल्ली -पाकिस्तानमध्ये कोरोना रुग्णांच्या संख्येत झपाट्याने वाढ होत आहे. पाकिस्तानने कोरोना रुग्णांच्या बाबतीत भारताला मागे टाकले असून येथे रुग्णांची संख्या १४०० वर पोहोचली आहे. तर संशयीतांचा आकडा १० हजारांच्या पुढे गेला आहे. मात्र कोरोना व्हायरसशी दोन हात करताना पाकिस्तानची हालत खराब होत चालली आहे. पाकिस्तानचे पंतप्रधान इम्रान खान यांनी कोरोनाने त्रस्त झालेल्या नागरिकांना दिलासा देण्यासाठी १.१३ ट्रिलियन (१ लाख १३ हजार कोटी) रुपयांचे आर्थिक पॅकेज जाहीर केले खरे, पण त्यांच्याकडे तेवढा पैसाच नाही. यामुळे घोषणा केलेल्या पॅकेजचे पैसे गोळा करण्यासाठी इम्रान खान आता आयएमएफ, जागतिक बँक आणि एडीबीसमोर दयेची भीक मागू लागले आहेत.

कोरोना संकटाचा सामना करण्यासाठी लॉकडाऊनची घोषणा केल्यानंतर संपूर्ण पाकिस्तानात सैन्याला पाचारण करण्यात आले आहे. पाकिस्तानात पंजाब प्रांत कोविड-१९ च्या रुग्णांसाठी केंद्रस्थान म्हणून समोर आले आहे. या संदर्भात येथील आरोग्य सल्लागार जफर मिर्झा यांनी माहिती दिली. देशात सध्या कोरोना व्हायरस संशयीत रुग्णांची संख्या १२,२१८ एवढी असून यामध्ये १४०८ रुग्ण पॉझिटीव्ह आढळून आल्याचे जफर यांनी स्पष्ट केले. कोरोना बधित सर्वाधिक रुग्ण इराणहून परतलेले आहेत. इराणमध्ये आतापर्यंत ३० हजार रुग्ण आढळले असून २३०० लोकांचा मृत्यू झाला आहे. बधितांमध्ये पंजाबमधून ४९०, सिंधमधून ४५७, पख्तूनख्वामधून १८०, बलुचिस्तान १३३, गिलगित बाल्टीस्थान १०७ आणि इस्लामाबादमधून ३९ रुग्ण आहेत. तर पाकव्याप्त काश्मीरमध्ये २ रुग्ण आढळले आहेत. पाकिस्तानात आतापर्यंत ११ लोकांनी कोरोनामुळे आपला जीव गमावला आहे. तर २५ रुग्ण बरे झाले आहेत. कोरोना बधित रुग्ण पंजाबमध्ये झपाट्याने वाढले असून पंजाब कोरोना रुग्णांचे केंद्र बनले आहे. दरम्यान पाकिस्तानमधील स्थितीची समीक्षा करण्यासाठी चीनमधील डॉक्टरांचे पथक येणार असल्याचे पंजाबचे मुख्यमंत्री उस्मान बुजदर यांनी सांगितले.