पाकिस्तानी सैन्यावर टीका करणाऱ्या महिला पत्रकाराचे अपहरण

लाहोर-पाकिस्तानच्या सैन्यावर टीका करणाऱ्या ५२ वर्षीय महिला पत्रकार गुल बुखारी गुल बुखारी यांचे अज्ञातांनी अपहरण केले होते. सोशल मीडियावर या अपहरणासाठी पाकिस्तानच्या गुप्तचर यंत्रणेला जबाबदार धरण्यात येत होते, त्यानंतर काही तासांतच त्या घरी सुखरुप परतल्या आहेत. महिला पत्रकाराच्या कुटुंबियांनी यासंबंधित तक्रार दाखल केली आहे.

गुल बुखारी या रात्री ११ वाजेच्या सुमारास त्यांच्या कार्यक्रमासाठी ‘वक्त टीव्ही’मध्ये जात होत्या. या दरम्यान काही अज्ञात व्यक्तींनी त्यांची गाडी लाहोर कॅंटजवळ अडवली आणि त्यांचं अपहरण केलं. दोन अज्ञात व्यक्तींनी अपहरण केल्याची माहिती त्यांच्या गाडी चालकाने कुटुंबियांना आणि पोलिसांना दिली. त्यानंतर गुल बुखारी यांचं अपहरण झाल्याचं वृत्त सोशल मीडियावर वाऱ्यासारखं पसरलं आणि गुप्तचर यंत्रणांनीचे त्यांचे अपहरण केल्याचा आरोप युजर्सकडून करण्यात येत होता.

गुल बुखारी या पाकिस्तानी सैन्यावर सातत्याने टीका करत असतात, लष्कराने राजकारणात हस्तक्षेप करण्यासही त्या विरोध करत होत्या. त्यामुळे गुप्तचर विभागानेच त्यांचं अपहरण केल्याचा अंदाज सोशल मीडियावर युजर्सनी आणि अन्य पकिस्तानी पत्रकारांनी वर्तवला होता. त्यानंतर अपहरणाच्या अवघ्या तीन तासांमध्येच त्यांची सुखरुप सुटका करण्यात आली. मात्र, त्यांचं अपहरण कोणी केलं होतं याबाबत माहिती मिळालेली नाही.