पाचदिवसीय गणरायाला साश्रूनयनांनी दिला निरोप

भुसावळ। यावल शहरासह तालुक्यात 43 सार्वजनिक गणेशोत्सव मंडळांनी मंगळवार, 29 रोजी पाच दिवसीय गणरायाला साश्रूनयनांनी निरोप दिला. एरव्ही शहरात डीजेचा दणदणाट ऐकू येत असलातरी यंदा मात्र अनेक मंडळांनी पारंपरिक वाद्यांना पसंती दिल्याने शहरवासीयांनाही मोठा दिलासा मिळाला. पोलिसांच्या कडेकोट बंदोबस्तात भाविकांनी नाचत-गात गणरायांना पुढच्या वर्षी या म्हणत निरोप दिला. सायंकाळी उशिरा विसर्जन मिरवणुकीला सुरुवात झाली. रात्री उशिरापर्यंत मिरवणुकीचा उत्साह कायम होता.

तालुक्यातील 43 सार्वजनिक मंडळांचा समावेश
यावल शहरातील 23 तर नायगाव दोन, कोरपावली- तीन, डांभूर्णी तीन, दहिगाव नऊ व सावखेडासीम येथील तीन मिळून एकूण 43 सार्वजनिक गणेशोत्सव मंडळांनी मंगळवारी गणरायांना निरोप दिला. यावल शहरातील मुख्य मिरवणुकीला उशीरा सुरवात झाली. महाजन गल्ली, बोरावल गेट, म्हसोबा, गवत बाजार, काजीपुरा मस्जीद, चावडी, कोर्ट रोड मार्गे रेणुका देवीच्या मंदिराजवळ मिरवणुकीची सांगता झाली. तेथून पुढे लहान मंडळांनी तारकेश्वर महादेव मंदिराजवळील पालिकेच्या कुंडात तर काही मंडळांनी भुसावळ तापी पात्रात तसेच काहींनी भुसावळ रस्त्यावरील हतनूर धरणाच्या कालव्यात श्री मूर्तीचे विसर्जन केले तर काही मंडळांनी मिरवणुकीमध्ये सहभागी न होता परस्पर श्री चे विसर्जन केले. घरगुती श्रीं च्या मुर्तीचे सकाळपासूनच विसर्जनास सुरवात झाल. विसर्जन शांततेत पार पडावे यासाठी शहरात तगडा बंदोबस्त तैनात होता. सहाय्यक पोलीस अधीक्षक नीलोत्पल, फैजपूर उपविभागीय पोलीस उपअधीक्षक राजेंद्र रायसिंग, पोलीस निरीक्षक दत्तात्रय परदेशी तसेच भुसावळ शहर पोलीस ठाण्याचे पोलिस निरीक्षक वसंत मोरे यांच्यासह सहकार्‍यांनी चोख बंदोबस्त राखला.