पाच जणांना मोकाट कुत्र्यांचा चावा

जळगाव । जळगाव शहरात मोकाट कुत्र्यांचा उच्छाद सुरूच असून, रविवारी एकाच दिवशी शहराच्या वेगवेगळ्या भागात या मोकाट कुत्र्यांनी पाच जणांवर हल्ला करून त्यांना जखमी केले. त्यात प्रौढांसह एका महिलेचाही समावेश आहे. या जखमींवर सिव्हील हॉस्पीटलमध्ये उपचार करण्यात आले. शहरासह तालुकाभरात झुंडीने भटके कुत्रे स्वैरपणे उच्छाद मांडत असतात. अनेकवेळा कुत्रे आडवा आल्याने गाडी पडून दुचाकीचालकांना किरकोळ जखमा होण्याचे प्रकार घडत असून मोकाट कुत्र्यांच्या चाव्याच्या घटनाही दिवसांगणिक वाढत आहेत.

यांना घेतला चावा…
कुत्र्यांचा चावा घेतल्याने जिल्हा रुग्णालयात पाच जणांवर उपचारासाठी दाखल करण्यात आला आहे. यामध्ये भालू मेहताब चव्हाण (वय 50 रा. कुसंबा), मैनाबाई चिमदाणी (वय 55 रा. सिंधीकॉलनी), शेख जुबेर शेख नासीर (वय 03 रा. शिवाजीनगर), टेकबहादूर गुरखा (वय 22 रा.जैनाबाद), शेख जाकीर शेख असलम (रा.पाचोरा) यांचा समावेश आहे. या मोकाट कुत्र्यांच्या चावा घेण्याच्या घटनांमध्ये वाढ होत असल्याने लहान मुलांना घराच्या अंगणात देखील खेळण्यास पालकवर्ग पाठवण्यास घाबरत आहे. भटक्या कुत्र्यांचा कायमस्वरूपी बंदोबस्त करण्याची मागणी पुढे येत असली तरी या भटक्या कुत्र्यांना आवरणार कोण? या प्रश्‍नाचे उत्तर मात्र अद्याप सापडलेले नाही.