पाच हजाराची लाच घेणार्या पोलिसाला 4 वर्ष सक्तमजुरीची शिक्षा
जिल्हा न्यायालयाचा निकाल ; आरोपीला अटक करण्यासाठी मागितली होती लाच
जळगाव : कौटुंबिक वादातून दाखल झालेल्या गुन्ह्यात आरोपीला अटक करण्यासाठी पाच हजार रुपयांची लाच घेतांना मेहुणबारे पोलीस स्टेशनचा कर्मचारी विजय श्रीराम पाटील याला धुळे येथील लाचलुचपत प्रतिबंधक विभागाने रंगेहाथ पकडले होते. या गुन्ह्यात जिल्हा न्यायालयाने पाटील यास 4 वर्ष सक्तमजुरी व दोन हजार रुपये दंडाची शिक्षा सुनावली. जिल्हा न्यायाधीश पी.वाय.लाडेकर यांनी मंगळवारी हा निकाल दिला. खटल्यात तत्कालीन जिल्हा पोलीस अधीक्षक डॉ.जालिंदर सुपेकर यांची साक्ष महत्वपूर्ण ठरली.
चाळीसगाव तालुक्यातील उंबरखेड येथील तक्रारदाराच्या बहिणीने सासरच्या लोकांविरुध्द मेहुणबारे पोलीस स्टेशनला तक्रार दिली होती, त्यानुसार गुन्हा दाखल झाला होता. या गुन्ह्याचा तपास विजय पाटील याच्याकडे होता. आरोपींना अटक करावी म्हणून तक्रारदाराने 26 मे 2015 रोजी विजय पाटील यांची भेट घेऊन आरोपींना अटक करण्याची विनंती केली होती, त्यावर पाटील याने त्यांच्याकडे 5 हजाराची मागणी केली होती. तक्रारदाराने धुळे येथील लाचलुचपत प्रतिबंधक विभागाकडे तक्रार केली होती.
अशिक्षित होता तक्रारदार
तपासाधिकारी विजय चौरे यांनी दोन सरकारी पंचासमक्ष लाच मागणीची पडताळणी केली. त्याची खात्री झाल्यानंतर चाळीसगाव रेल्वे स्टेशन परिसरात एका रसवंतीवर विजय पाटील याला पाच हजार रुपयांची लाच स्विकारताना रंगेहाथ पकडण्यात आले. या प्रकरणात तक्रारदार अशिक्षित असून त्याला लिहिता व वाचता येत नाही, त्यामुळे सरकारी वकील मोहन देशपांडे यांनी तक्रार शाबीत करण्यासाठी तक्रारदाराला तक्रार लिहून देणारे बहादूर मजीद पठाण यांची मदत घेतली व त्यांची साक्ष घेतली. घेतलेली तक्रार तक्रारदाराला जशीच्या तशी वाचून दाखविण्यात आली. लाच मागणी कलमाखाली तीन वर्ष व लाच स्विकारली म्हणून चार वर्ष सक्तमजुरी व प्रत्येकी दोन हजाराचा दंड ठोठावला.
डॉ.जालिंदर सुपेकर यांची महत्वपूर्ण साक्ष
जळगाव येथील न्यायालयात या प्रकरणाचे दोषारोपपत्र दाखल झाले होते. न्या.पी.वाय.लाडेकर यांच्या न्यायालयात हा खटला चालला. या खटल्यात तत्कालिन सक्षम अधिकारी तथा पोलीस अधीक्षक डॉ.जालिंदर सुपेकर व तपासाधिकारी विजय चौरे यांची साक्ष महत्वपूर्ण ठरली. पैरवी अधिकारी अनिल सपकाळे केसवॉच सुनील शिरसाठ यांनी सहकार्य केले. सरकारतर्फे अॅड.मोहन देशपांडे यांनी काम पाहिले.