पालिकेच्या इमारती सौरउर्जेने झळकणार

4 कोटींची निविदा स्थायी समितीपुढे

पुणे : महापालिकेच्या 34 इमारतींवर सौर ऊर्जा प्रकल्प सुरू करण्यात येणार आहेत. त्यासाठी सन 2016 मध्ये जाहीर करण्यात आलेली निविदा प्रक्रिया तब्बल 2 वर्षांनी म्हणजे सन 2018 मध्ये अंतिम टप्प्यात पोहचली आहे. सुरुवातीला महापालिकेच्या मुख्य इमारतीवर हा प्रकल्प करण्यात येणार आहे. त्यासाठीची ही निविदा आहे. यात मुख्य इमारतीच्या टेरेसवर 825 किलो वॅट क्षमतेची कनेक्टेड रुफ टॉप सोले पी. व्ही सिस्टिम उभारण्यात येणार आहे.

जुलै 2016 मध्ये ही निविदा मागवण्यात आली होती. त्याला मुदतीत प्रतिसाद मिळाला नाही. त्यामुळे मुदतवाढ देण्यात आली. त्यानंतर 5 कंपन्यांचा प्रतिसाद मिळाला. त्यातील 3 कंपन्या सुरुवातीलात अपात्र ठरल्या. जुलै 2017 मध्ये उर्वरित निविदा खुल्या करण्यात आल्या. त्यानंतर आता थेट ऑक्टोबर 2018 मध्ये प्रशासनाने या निविदांमधून 4 कोटी 95 लाख रुपयांची सर्वाधिक कमी किंमतीची निविदा मान्यतेसाठी म्हणून स्थायी समितीकडे दिली आहे.

34 इमारतींवर राबविणार प्रकल्प

महापालिकेचा विजेचा खर्च प्रचंड वाढला आहे. अपारंपरिक विजेचे स्रोत निर्माण करण्याकडे त्यामुळे लक्ष दिले जात आहे. त्यातूनच महापालिकेच्या 34 इमारतींवर सौर ऊर्जा प्रकल्प सुरू करण्याचा विचार पुढे आला आहे. मुख्य इमारतीपासून याला सुरुवात करण्यात येईल. किमान मुख्य इमारतींमधील दिवे या विजेवर चालावेत, असे अपेक्षित आहे. सुरुवातीला यात 10 वर्षे देखभालदुरूस्तीची अट होती. ती आता 5 वर्षे करण्यात आली आहे. तरतूद नसल्यामुळे निविदा प्रक्रियेस विलंब झाला. आता निविदा प्रक्रिया पूर्ण झाली आहे. कार्यारंभ आदेश दिल्यानंतर अल्पावधीतच काम सुरू होईल. त्यानंतर महापालिकेच्या मालकीच्या अन्य इमारतींमध्येही हा प्रकल्प राबवण्यात येईल, असे मुख्य अभियंता श्रीनिवास कंदूल यांनी सांगितले.