पालिकेतील विभागप्रमुखांच्या बदल्या

त्वरित कार्यभार घेण्याचा आयुक्त सौरभ राव यांचा आदेश

पुणे : महापालिका आयुक्त सौरभ राव यांनी विभागप्रमुखांच्याही बदल्या केल्या आहेत. घनकचरा व्यवस्थापन विभागाचे सहायक आयुक्त सुरेश जगताप यांच्यासह अन्य काही महत्त्वाच्या विभागप्रमुखांना दुसर्‍या विभागात हलविण्यात आले आहे. दुसर्‍या ठिकाणचा कार्यभार त्वरित घेण्याचे आदेश देण्यात आले आहेत.घनकचरा व्यवस्थापन विभागाचे जगताप यांना आता उपायुक्त परिमंडळ क्रमांक 4 हे पद देण्यात आले आहे. त्यांच्या जागेवर सहायक आयुक्त ज्ञानेश्‍वर मोळक यांची नियुक्ती करण्यात आली आहे. मोळक यांच्याकडे स्थानिक संस्था कर व परिमंडळ क्रमांक 4 चा कार्यभार होता. स्थानिक संस्था कर कायम ठेवून परिमंडळ क्रमांक 4 मधून त्यांना कार्यमुक्त करण्यात आले आहे.

तुषार दौंडकर यांच्याकडील आकाश चिन्ह विभागाचा अतिरिक्त कार्यभार विजय दहिभाते यांच्याकडे देण्यात आला आहे. त्यांच्याकडे परिमंडळ क्रमांक 1 चे उपायुक्त म्हणून कार्यभार आहे. तो सांभाळून त्यांनी या पदाचा कार्यभार पाहायचा आहे. त्यांच्याकडे पूर्वीही हा विभाग होता. दौंडकर यांच्याकडेच क्रीडा विभागाचाही अतिरिक्त कार्यभार होता. तो उपायुक्त किशोरी शिंदे यांच्याकडे सोपविण्यात आला आहे. त्यांनीही आपल्या मूळपदाचा कार्यभार सांभाळून हा नवा कार्यभार पाहायचा आहे. स्थापत्य विभागातील अधिक्षक अभियंता मदन आढारी यांच्याकडील प्रकल्प क्रमांक 2 चा कार्यभार बदलून त्यांना मलनि:सारण विभागाची देखभाल-दुरुस्ती सोपविण्यात आली आहे. या पदावर कार्यरत असलेले हेमंत देवधर यांना पाणीपुरवठा विभागात बदलण्यात आले आहे. पाणीपुरवठा विभागातील जगदीश खानोरे यांना तिथून बदलून प्रकल्प क्रमांक 2 ची जबाबदारी देण्यात आली आहे.

…तर शिस्तभंगाची कारवाई

काही विभागप्रमुखांबाबत पदाधिकार्‍यांची तक्रार होती. कामांना विलंब लावणे, पदाधिकार्‍यांचे सांगणे टाळणे,यामुळे त्यांच्याबाबत पदाधिकार्‍यांमध्ये नाराजी होती. बदल्यांवर त्याचा परिणाम दिसून येत आहे. राव यांनी आयुक्तपदाची सूत्रे हाती घेतल्यानंतर प्रथमच विभागप्रमुखांसह कनिष्ठ अभियंत्यांच्याही बदल्या केल्या आहेत. राजकीय दबाव किंवा अन्य मार्गाने बदली टाळण्याचा प्रयत्न केल्यास शिस्तभंगाची कारवाई करण्याची तंबीही देण्यात आली आहे.