पिंपरीगाव ते हडपसर बस सेवा सुरू

अन्य तीन मार्गांवरही बससेवा

पिंपरीः पिंपरी गावातून शहरातील विविध मार्गांवर पीएमपीएलच्या बस सेवा सुरू करून सार्वजनिक वाहतूक सुविधा सक्षम करण्यासाठी प्रयत्न करू असे, आश्‍वासन नगरसेवक संदीप वाघेरे यांनी दिले. पीएमपीएमएलच्यावतीने पिंपरीगाव ते हडपसर शेवाळवाडी तसेच पिंपरीगाव ते हिंजवडी फेज 3 या बस मार्गांचा शुभारंभ नगरसेवक वाघेरे व ज्येष्ठ पत्रकार नंदकुमार सातुर्डेकर यांच्या हस्ते झाला. या उद्घाटन प्रसंगी नगरसेवक वाघेरे बोलत होते. पीएमपीएमएलचे मुख्य समन्वयक अधिकारी संतोष माने, वाहतूक निरीक्षक कृष्णा सोनवणे, वाहतूक नियोजन उत्तरेश्‍वर बळे, माजी नगरसेविका गिरीजा कुदळे, शारदा मुंडे, रंजना जाधव, सामाजिक कार्यकर्ते संदीप गव्हाणे, महादेव वाळुंजकर, ज्येष्ठ नागरिक सुधाकर यादव, मुरलीधर जगताप, नामदेव कुदळे, अमित कुदळे, हरीश वाघेरे, श्रीकांत वाघेरे, रुपेश वाघेरे, संजय गायके आदी उपस्थित होते.

प्रवाशांनी बसने प्रवास करावा
पिंपरीगावचा विस्तार झाला आहे; मात्र गावातून पूर्व पीसीएमटीच्या काळात सुरू झालेले मार्गही बंद झाले आहेत. सार्वजनिक वाहतूक व्यवस्था कोलमडली. प्रवासी खासगी साधनांकडे वळाले आहेत. पीएमपीएलला पूर्वीचे गतवैभव प्राप्त करून देणे गरजेचे आहेत. त्यासाठी प्रयत्न सुरु आहेत. बस मार्ग सुरू रहावेत यासाठी प्रवाशांनी या मार्गावर बसने प्रवास करावा. अन्यथा प्रतिसाद न लाभल्याने पिंपरीगाव ते पंढरपूर एसटी बंद झाली. तसे होऊ नये याची नागरिकांनी दक्षता घ्यावी, असे आवाहनही त्यांनी केले. माजी नगरसेविका गिरीजा कुदळे यांनी सर्वच मार्गावरील बसेसचे वेळापत्रक बसस्टॉप वर लावावे अशी सूचना केली.