पिंपरी-चिंचवडची शिब्रा तुपके झाली ‘मिस एशिया पॅसिफिक‘!

पिंपरी-चिंचवड : थायलंड येथे नुकत्याच पार पडलेल्या ‘मिस एशिया पॅसिफिक’ या सौंदर्यवती स्पर्धेचे विजेतेपद शहरातील शिब्रा तुपके हिने पटकाविले आहे. त्यामुळे पिंपरी-चिंचवड शहराच्या शिरपेचात आणखी एक मानाचा तुरा रोवला गेला आहे. शिब्राने दुबई, थायलंड, श्रीलंका, मलेशिया आणि सिंगापूर या देशांच्या सौंदर्यवतींना मागे टाकत ‘मिस एशिया पॅसिफिक’ हे टायटल पटकाविले आहे. सोबतच याच स्पर्धेत तिला ‘मिस फोटोजेनिक’ हेदेखील पारितोषिक मिळाले आहे.

मॉडेलिंगमध्ये करिअर करण्याची इच्छा
शिब्रा सध्या पुण्यातील नामांकीत महाविद्यालयात ‘इलेक्ट्रॉनिक्स अ‍ॅण्ड टेलिकम्युनिकेशन इंजिनिअरिंग’च्या तिसर्‍या वर्षाला शिकत आहे. इंजिनिअरिंगचे शिक्षण घेत असली तरी मॉडेलिंग विश्वात तिला करिअर करण्याची रुची आहे. 2015 पासूनच तिने मॉडेलिंग करण्यास सुरुवात केली होती. मिस एशिया पॅसिफिक या स्पर्धेपूर्वी अशा प्रकारच्या 8 ते 10 स्पर्धांमध्ये तिने सहभाग घेतला होता. यापैकी मिस सिंहगड करंडक, फ्रेश सेस या पुणे जिल्हा पातळीवरील स्पर्धेचे टायटल तिने आपल्या नावावर केले. त्यानंतर द फिटनेस क्वीन व नॅशनल मिस ग्लोबल इंडिया, असे दोन्ही राष्ट्रीय पातळीवरील टायटलही जिंकले आहे.

स्पर्धा आव्हानात्मक होती
आंतरराष्ट्रीय पातळीवर परफॉर्मन्स करताना तुम्हाला तुमच्या नावाने नव्हे; तर भारताच्या नावाने तुम्हाला पारखले जाते. त्यामुळे ही स्पर्धा माझ्यासाठी खूप आव्हानात्मक होती. स्पर्धेतील प्रत्येक फेरीत अगदी विचारपूर्वक परफॉर्मन्स देत गेले. कोणतीही गोष्ट अतिरंजित वाटणार नाही याची काळजी घेतली. स्पर्धेच्या रॅम्प वॉक, टॅलेंट राऊंड, फोटोशूट प्रत्येक ठिकाणी मी हायस्कोर नोंदवला. मात्र स्पर्धेतील प्रश्नोत्तराचा राऊंड निर्णायक ठरला, असे शिब्राने सांगितले.

तेलगू चित्रपटाची ऑफर
शिब्राला सध्या एका तेलगू चित्रपटात काम करण्याची ऑफर आहे. मराठी चित्रपटात काम करायला आवडेल का, असे विचारल्यावर तिने, मराठी चित्रपटात नाव गाजवायला मला निश्चितच आनंद होईल, असे सांगितले. आपल्या टॅलेंटच्या बळावर व घरच्यांच्या संपूर्ण पाठिंब्यामुळे शिब्राने पिंपरी-चिंचवड शहराच्या शिरपेचात एक मानाचा तुरा रोवला आहे.