‘पिंपरी चिंचवड दर्शन’ बसचे केंद्रीय मंत्री रामदास आठवलेंच्या हस्ते उद्‌घाटन
पिंपरी :- ‘पिंपरी चिंचवड दर्शन’ बस सेवेचे केंद्रीय सामाजिक न्याय राज्यमंत्री रामदास आठवले यांच्या हस्ते शनिवारी उद्‌घाटन करण्यात आले आहे. उपशहरातील दोन मार्गावरुन या वातानुकूलीत बस धावणार असून प्रती व्यक्ती ५०० रूपये शुल्क असणार आहे. निगडी येथे झालेल्या कार्यक्रमाला राज्याचे सामाजिक न्याय राज्यमंत्री अविनाश महातेकर, लोकशाहीर अण्णाभाऊ साठे महामंडळाचे अध्यक्ष अमित गोरखे, महापौर राहुल जाधव, स्थायी समिती सभापती विलास मडीगेरी, महापालिका आयुक्त श्रावण हर्डीकर यांच्यासह नगरसेवक, नगरसेविका उपस्थित होते.
असा असेल बसचा प्रवास…
उपशहरातील दोन मार्गावरुन या बस धावणार असून सकाळी साडे आठ वाजता निगडीच्या भक्ती-शक्ती समुह शिल्प चौक आणि भोसरी चौकातून ही बस सुटणार आहेत. त्यात तिर्थक्षेत्र देहू आणि आळंदीचा समावेश करण्यात आला आहे. सायन्स पार्क, बर्ड व्हॅली उद्यान व इतर ठिकाणी असलेले शुल्क संबंधित व्यक्तीस स्वत: भरावे लागणार आहे. एक बस सकाळी साडेआठ वाजता निगडीच्या भक्ती-शक्ती समुह शिल्प चौकातून सुटणार आहे. तेथून रावेत येथील इस्कॉन मंदिर, चिंचवडगावातील मोरया गोसावी मंदिर, मंगलमूर्ती वाडा, चापेकर वाडा, चापेकर बंधू स्मारक, सायन्स पार्क, संभाजीनगरची बर्ड व्हॅली, निगडीची दुर्गा देवी टेकडी, अप्पूघर असे फिरून तिर्थक्षेत्र देहूगाव मार्गे निगडीत परतणार आहे. हे अंतर ४३.५० किलोमीटर आहे.
भोसरीतूनही दर्शन बस…
दुसरी पिंपरी चिंचवड दर्शन बस भोसरी चौकातून सुटून आळंदीत दर्शन होणार आहे. तेथून लांडेवाडीतील शिवसृष्टी दाखविली जाणार आहे. त्यानंतर बर्ड व्हॅली, सायन्स पार्क, मोरया गोसावी मंदिर, चापेकर वाडा, मंगलमूर्ती वाडा, दुर्गादेवी टेकडी व भक्ती-शक्ती समुह शिल्प दाखविले जाणार आहे. समारोप सायंकाळी सहाला भोसरीत होणार आहे. हे अंतर ५१.३० किलोमीटर आहे.
००००००