पिंपळे गुरवमध्ये पत्नीसाठी करणार वटपौर्णिमेचे व्रत

मानवी हक्क संरक्षण व जागृतीचा उपक्रम

नवी सांगवी- प्रत्येक क्षेत्रात महिला या पुरुषाच्या खांद्याला खांदा लावून बरोबरीने कामे करु लागल्या आहेत. कायद्याने त्यांना समान अधिकार प्रदान केले आहेत. त्यानुसार पिंपरी-चिंचवड शहराच्यावतीने मानवी हक्क संरक्षण व जागृती संघटनेतर्फे पिंपळे गुरव येथे पुरुष मंडळींकडून वटवृक्षाची मनोभावे पुजा करुन दीर्घ आयुष्य असणार्‍या वटवृक्षाला सात प्रदक्षिणा घालत आम्हीही जन्मोजन्मी हीच पत्नी मिळावी, हे मागणं मागणार असल्याचे संघटनेचे शहराध्यक्ष आण्णा जोगदंड यांनी सांगितले. भारतीय संस्कृतीत वटपोर्णिमेला अनन्य साधारण महत्व आहे. वटपोर्णिमेदिवशी महिला वटवृक्षाची मनोभावे पुजा करुन सात प्रदक्षिणा घालुन सुत गुंडाळतात. भारतीय संस्कृतीत सात जन्मी हाच पती मिळावा, म्हणून महिला वटवृक्षाप्रमाणे पतीला दीर्घ आयुष्य लाभावे, याकरिता वटपोर्णिमा साजरी करतात. त्यानुसार देशात पुरुष प्रधान संस्कृतीत पुरुषाकडून देखील जन्मोजन्मी हीच पत्नी मिळावी, याकरिता वटपोर्णिमा साजरी केल्यास काधीही वावगे असणार नाही.

प्लास्टिक न वापरण्याची घेणार शपथ
सामाजिक बांधिलकी समजुन संघटनेच्यावतीने कांकरिया गॅस गोडाऊनमध्ये बुधवारी (दि.27) सकाळी 10 वाजता वटपोर्णिमा साजरी करणार आहेत. यावेळी प्लास्टिक न वापरण्याची व पर्यावरण जनजागृतीची नागरिकांना शपथ देण्यात येणार आहे. याप्रसंगी संघटनेचे राष्ट्रीय अध्यक्ष विकास कुचेकर, शहर उपाध्यक्ष विकास शहाणे, संगिता जोगदंड, अ‍ॅड. सचिन काळे, अरुण पवार, अरविंद मांगले, वसंत चकटे, मुरलीधर दळवी, हनुमंत पंडीत, एस.डी.विभुते, दीपक शहाणे, गजानन धाराशिवकर, दत्तात्रय घोरपडे, अदिती निकम, शांताराम पाटील, शिवानंद तालकोटी यांच्यासह अनेक पुरुष, महिला स्वंयफुर्तीने सहभागी होणार आहेत.