पिंपळे सौदागर मधील रस्ते ‘युटीडब्ल्यूटी’ पद्धतीने विकसित करा

नगरसेवक शत्रुघ्न काटे यांची आयुक्तांकडे मागणी

पिंपरी :– पिंपरी चिंचवड शहरातील अत्यंत वेगाने विकसित होत असलेला परिसर म्हणून पिंपळे सौदागरकडे पाहिले जाते. स्मार्टसिटी अंतर्गत येथे सध्या विविध प्रकारची कामे सुरू आहेत. त्यामुळे नागरिकांना वाहतुकीस होणारा त्रास लक्षात घेता येथील बहुतेक विकसित झालेले रस्ते ‘युटीडब्ल्यूटी’ पद्धतीने विकसित करावेत व नव्याने ताब्यात येणारे डीपी रोड ‘पीक्यूसी’ पद्धतीने करण्यात यावेत अशी मागणी नगरसेवक शत्रुघ्न काटे यांनी महापालिका आयुक्त श्रावण हर्डीकर यांच्याकडे केली आहे.

यासंदर्भात नगरसेवक शत्रुघ्न काटे यांनी आयुक्तांना दिलेल्या निवेदनात म्हटले आहे की, प्रभाग क्रमांक 28 पिंपळे सौदागर हा स्मार्टसिटी अंतर्गत विकसित करण्याचे काम सुरू आहे. सध्याच्या स्थितीत सेव्हन स्टार रोड, शिवसाई रोड, गणादिश सोसायटी समोरील डीपी रोड हे ‘पीक्यूसी’ पद्धतीने विकसित करण्याचे काम सुरू आहे. या कामांतर्गत विविध सेवा वाहिनी स्थलांतरित करण्यात येत आहेत. परंतु या कामामुळे नागरिकांच्या प्रचंड तक्रारी येत आहेत. पिंपळे सौदागर हा अत्यंत दाट लोकवस्तीचा भाग असून येथील रस्त्यावर सेवा वाहिन्यांचे प्रचंड प्रमाणात जाळे आहे. या सेवा वाहिनी स्थलांतरित करण्यास खूप कालावधी लागत आहे. त्यामुळे स्थानिक नागरिकांना वाहतुकीस व दैनंदिन जीवनात प्रचंड त्रास होणार असून गैरसोय देखील होणार आहे. तरी या सर्व भौगोलिक गोष्टींचा विचार करून पिंपळे सौदागर मधील बहुतेक विकसित झालेले रोड ‘युटीडब्ल्यूटी’ पद्धतीने विकसित करण्यात यावेत. तसेच पिंपळे सौदागर मधील नव्याने ताब्यात येणारे डीपी रोड ‘पीक्यूसी’ पद्धतीने करण्यात यावेत. अशा पद्धतीने काम केल्यास या प्रभागातील रस्त्यांसह इतर कामे लवकरात लवकर होतील. तरी आयुक्तांनी यासर्व गोष्टींचा विचार करून तातडीने संबंधीत विभागाला या संदर्भातील आदेश द्यावेत अशी मागणी नगरसेवक शत्रुघ्न काटे यांनी केली आहे.