पिस्तूलाच्या धाकावर पेट्रोल पंप लूटला

भुसावळ । प्रतिनिधी । दुचाकीवरून आलेल्या तिघांनी पिस्तुलाचा धाक दाखवत पेट्रोल पंप लुटून अडीच लाखांची रोकड लांबवल्याची घटना भुसावळ-मुक्ताईनगर महामार्गावरील बोहर्डी बु.॥ गावाजवळील नागराणी पेट्रोल पंपावर शुक्रवारी पहाटे पाच वाजेच्या सुमारास घडली. या घटनेने खळबळ उडाली आहे. दरोडेखोरांनी रोकड न देणार्‍या मॅनेजरच्या डोक्यात लोखंडी रॉड मारल्याने तो गंभीर जखमी झाला.

सिनेस्टाईल लूट

भुसावळचे नगरसेवक रमेश नागराणी यांचा भुसावळ-मुक्ताईनगर महमार्गावर बोहर्डी गावाजवळ नागराणी पेट्रोलियम या नावाने पंप आहे. शुक्रवारी पहाटे पावणेपाच ते पाच वाजेदरम्यान दुचाकीवरुन आलेल्या तिघांनी ५० रुपयांचे पेट्रोल भरले. पंपावर मॅनेजर व एक कर्मचारी जागा असताना व दुसरा झोपला असताना दरोडेखोरांनी गावठी पिस्तुलाचा धाक दाखवत गल्ल्यातील सुमारे अडीच लाखांची रोकड काढून पळ काढला. सुरुवातीला रोकड न देणार्‍या पंपावरील मॅनेजर प्रभाकर खंडारे यांच्या डोक्यात लोखंडी रॉड मारून त्यांना गंभीर जखमी करण्यात आले. लूटीनंतर दरोडेखोर पसार झाले.

सीसीटिव्ही फुटेजही लांबवले

पेट्रोल पंप लूटण्याची घटना कळाल्यानंतर मुक्ताईनगरचे उपअधीक्षक नेवे, वरणगावचे सहाय्यक निरीक्षक जगदीश परदेशी यांनी धाव घेतली तर जळगाव येथून श्‍वान पथकाला पाचारण करण्यात आले. दरम्यान, नागराणी पेट्रोल पंपावर लावण्यात आलेले सीसीटीव्ही फुटेजही चोरट्यांनी लांबवल्याने चोरटे हे सराईत व माहितगार असल्याचा कयास वर्तवला जात आहे.