पीसीएमसीचा अर्थसंकल्प 15 फेब्रुवारीला!
काम अंतिम टप्प्यात : स्थायी समितीसमोर मांडणार
पिंपरी (प्रतिनिधी)- पिंपरी-चिंचवड महापालिकेच्या 2018-19 या आर्थिक वर्षाच्या अर्थसंकल्पाचे काम अंतिम टप्यात असून, अखेरचा हात मारला जात आहे. आयुक्त श्रावण हर्डीकर हे 15 फेब्रुवारीरोजी अर्थसंकल्प स्थायी समिती समोर सादर करणार आहेत. दरम्यान, पिंपरी महापालिकेचा गतवर्षीचा अर्थसंकल्प जेएनएनयुआरएम व केंद्र शासनाच्या इतर योजनांसह पाच हजार 100 कोटींचा होता.
कामे सूचविण्यात नागरिकांचा सहभाग
महापालिकेने 2018-19 या आर्थिक वर्षाच्या अर्थसंकल्पासाठी दहा लाखांपर्यंतची कामे सुचविण्याचे आवाहन केले होते. त्याला नागरिकांचा चांगला प्रतिसाद मिळाला असून, 101 जणांनी कामे सूचविली आहेत. त्यामध्ये स्थापत्य, विद्युत आणि पाणीपुरवठा विषयक कामे आहेत. या कामांचा अर्थसंकल्पामध्ये समावेश होणार आहे. आगामी वर्षात शून्य तरतूद असलेले सर्व लेखा शिर्षक वगळण्यात येणार आहेत. जेवढ्या रकमेचे काम आहे. तेवढ्याच रकमेची निविदा काढायची, त्यासाठी तेवढीच रक्कम अर्थसंकल्पात ठेवावी, असे आदेश सर्व विभागप्रमुखांना दिले आहेत. त्यामुळे वाढीव, सुधारित खर्चाला आळा बसणार आहे. जेवढी कामे करायची तेवढ्याच कामांचा समावेश अर्थसंकल्पात करावा. अनावश्यक कामांचा करु नये. शून्य तरतूद अथवा टोकन हेडला यंदापासून मज्जाव करण्यात आला आहे. त्यामुळे आहे त्याच कामावर लक्ष केंद्रित केले जाणार आहे.
पुस्तकाचा आकारदेखील लहान
आयुक्त श्रावण हर्डीकर हे मांडत असलेल्या अर्थसंकल्पात नवीन संकल्पना असतील. अर्थसंकल्पाच्या पुस्तकाचा आकारदेखील लहान असणार आहे. अर्थसंकल्पाचे काम अंतिम टप्यात आहे. केवळ दोन ते तीन विभागाची माहिती राहिली आहे. 15 फेब्रुवारीरोजी आयुक्त स्थायी समितीसमोर अर्थसंकल्प सादर करणार आहेत.