पुणे मनपा अधिकाऱ्याकडून महिला अधिकाऱ्याकडे शरीरसुखाची मागणी; गुन्हा दाखल

पुणे : देशभरात सध्या #Me Too मोहीम सुरु आहे. या मोहिमेंतर्गत महिला त्यांच्यावर झालेल्या लैंगिक अत्याचाराला वाचा फोडत आहे. दरम्यान पुणे महापालिकेच्या ढोले पाटील रोड क्षेत्रीय कार्यालयातील महिला अधिका-याकडे मुख्य आरोग्य निरीक्षक बाळासाहेब साबळे यांनी प्रत्यक्ष भेटून शरीरसुखाची मागणी केल्याचा धक्कादायक प्रकार उघडकीस आला आहे. या प्रकरणी एका ३१ वर्षांच्या महिला अधिकाऱ्याने बंडगार्डन पोलीस ठाण्यात फिर्याद दिली असून पोलिसांनी मुख्य आरोग्य निरीक्षकाविरोधात विनयभंगाचा गुन्हा दाखल केला आहे.

या महिला अधिकारी जून २०१८ पासून महापालिकेच्या ढोले पाटील रोड क्षेत्रीय कार्यालयात कार्यरत आहेत, या पूर्वीही ते दुसऱ्या क्षेत्रीय कार्यालयात एकत्र कार्यरत होते. त्यावेळीही साबळे तिला त्रास देत होते. जून २०१८ ते २४ ऑक्टोबर २०१८ दरम्यान साबळे यांनी या महिलेला वारंवार फोन करून व प्रत्यक्ष भेटून शरीरसुखाची मागणी केली. तसेच दुसऱ्या अधिकाऱ्यांना सांगून तिला कामासाठी माझ्याकडे एकटीला पाठव, असे सांगत असे या महिलेला कामानिमित्त २४ ऑक्टोबर रोजी कोरेगाव पार्क येथे बोलावून तिच्याकडे शरीरसुखाची मागणी केली’

विशाखाकडे तक्रार नाही
वरिष्ठाने विनयभंग केला, असा आरोप करणाऱ्या पालिकेतील महिलेने याबाबत महापालिकेच्या विशाखा समितीकडे तक्रार केली नव्हती, असे या समितीच्या अध्यक्ष व मुख्य लेखा व वित्त अधिकारी उल्का कळसकर यांनी सांगितले. क्षेत्रीय कार्यालय स्तरावरही विशाखा समिती स्थापन करण्यात आल्या आहेत. ढोले पाटील क्षेत्रीय कार्यालयाचे सहआयुक्त अरुण खिलारी यांना याबाबत संपर्क करण्याचा प्रयत्न केला असता ते उपलब्ध होऊ शकले नाहीत.