पुणे रेल्वे स्थानकासाठी 50 कोटी

पुणे । पुणे रेल्वे स्थानकाच्या पुनर्विकासाच्या कामासाठी रेल्वे बोर्डाने 50 कोटी रुपयांचा निधी मंजूर केला आहे. पुनर्विकासाच्या कामासह फलाट क्र. 2 ते 6 ची लांबी वाढविण्यात येणार आहे. त्यामुळे स्थानकावरील सर्वच फलाटांवर 26 कोचच्या गाड्या थांबू शकतील. मार्च, 2019पर्यंत हे काम पूर्ण करण्याचे उद्दिष्ट ठेवण्यात आले आहे, अशी माहिती पुणे विभागाचे व्यवस्थापक मिलिंद देऊस्कर यांनी दिली.

प्रत्येक गाडी प्रत्येक फलाटवर उभी राहील
सध्या पुणे रेल्वे स्थानकाच्या फलाट क्रमाक 1 वगळता अन्य 2 ते 6 फलाट क्रमांकाची लांबी कमी असल्याने तेथे 26 डब्यांची गाडी थांबविली जात नाही. त्यामुळे अनेकवेळा लांब पल्याच्या गाड्या या स्थानकाच्या अलीकडे शंभर ते दीडशे मीटरवर उभ्या कराव्या लागतात. प्रत्येक रेल्वे गाडी ही प्रत्येक फलाटवर उभी राहिली पाहिजे, अशी व्यवस्था करण्यात येणार आहे.

मालगाडी थांबवता येत नाही
क्र. 2 ते 6 ची लांबी कमी असल्याने तेथे 26 डब्यांची गाडी थांबविली जात नाही. केवळ एक क्रमांकाच्या फलाटावरच 26 डब्यांच्या गाड्या थांबतात, असे नमूद करून देऊस्कर म्हणाले, रेल्वे स्थानकाची लांबी कमी असल्याने या फलाटांवर मालगाडी थांबविता येत नाही. त्यामुळे एक्स्प्रेस गाड्यांना थांबवून मालगाडीला प्रथम सोडावे लागते. परिणामी, इतर गाड्यांना 10 मिनिटे उशीर होतो. परंतु, लवकरच 2 ते 6 फलाटांची लांबी वाढविण्यात येणार आहे.

प्रवाशांच्या सोयीसाठी उपयोग
सध्या पुणे रेल्वे स्टेशनवरील एक वगळता सर्व फलाटांची लांबी कमी असल्यामुळे येथे 26 डब्बांची गाडी थांबविण्यास अडचण येते. हेच लक्षात घेऊन मालगाड्यांची सोयही येथे झाली पाहिजे अशी मागणी रेल्वे प्रसाशनाकडून होत आहे. प्रवाशांच्या सोयीसाठी तसेच लांब पल्ल्याच्या गाड्यांसाठी ही व्यवस्था करण्यात येणार असल्यामुळे येणार्‍या निधीचा फायदा करून घेण्यात येणार असल्याचे देऊस्कर यांनी स्पष्ट केले.

ऑटोमॅटिक सिग्नल ब्लॉकिंग
देऊस्कर म्हणाले, सर्व फलाटांवर 26 डब्यांच्या गाड्या उभ्या करता याव्यात, या दृष्टीने शिवाजीनगरच्या दिशेला या फलाटांची लांबी वाढविली जाणार आहे. पुणे-लोणावळा मार्गावर ऑटोमॅटिक सिग्नल ब्लॉकिंगचे काम सुरू असून, आत्तापर्यंत पुणे ते कामशेत दरम्यानचे काम पूर्ण झाले आहे.