पुणे विद्यापीठातील कर्मचार्‍यांना गणवेश सक्ती
पुणे । सावित्रीबाई फुले पुणे विद्यापीठातील कर्मचार्‍यांनी विद्यापीठाने दिलेला गणवेश दररोज कार्यालयीन वेळेत परिधान करावा. गणवेश परिधान न करणार्‍यांवर कारवाई करण्याचा निर्णय विद्यापीठ प्रशासनने घेतला आहे. त्यामुळे आता विद्यापीठाच्या कर्मचार्‍यांना गणवेश सक्तीचे होणार आहेत.
विद्यापीठातील वर्ग-3 मधील तांत्रिक पदांवर कार्यरत असलेल्या काही सेवकांना व वर्ग-4 मधील विविध पदावर कार्यरत असलेल्या कर्मचार्‍यांना विद्यापीठामार्फत प्रत्येकी 3 गणवेश देण्यात आलेले आहेत. कार्यालयीन वेळेत गणवेश परिधान करणे अनिवार्य आहे. कर्मचार्‍यांना वारंवार सूचना देऊन देखील अनेकजण गणेवश परिधान करीत नसल्याचे निदर्शनास आले आहे. त्याचप्रमाणे काही कर्मचार्‍यांनी गणवेश घेतलेला नसल्याचा अहवाल प्राप्त झाला आहे, असे विद्यापीठ प्रशासनने म्हटले आहे.
त्या पार्श्वभूमीवर प्रभारी कुलसचिव डॉ. अरविंद शाळिग्राम यांनी सेवकांना गणवेश परिधान करणे सक्तीचे आहे, असे परिपत्रक प्रसिद्ध केले आहे. ज्या सेवकांनी सर्वसाधारण विभागाकडून गणवेश घेतलेला नाही, त्यांनी त्वरित सर्वसाधारण विभागाकडून आपला गणवेश घ्यावा. हा गणवेश कार्यालयीन वेळेत परिधान करणे बंधनकारक आहे. गणवेश परिधान न करणार्‍या कर्मचार्‍यांवर प्रशासकीय कारवाई करण्यात येणार असल्याचे परिपत्रकात नमूद करण्यात आले.