पुण्याचा अभिजित महाराष्ट्र केसरी!

पुणे : पुण्याचा पैलवान अभिजित कटके यंदाचा महाराष्ट्र केसरी ठरला आहे. अभिजित कटकेने एकतर्फी झालेल्या अंतिम लढतीत सातार्‍याच्या किरण भगतला चितपट करत महाराष्ट्र केसरीची मानाची गदा जिंकली. अभिजित-किरण यांच्यात अंतिम लढ सुरवातीला अटीतटीची झाली. मात्र अभिजितने किरणला चितपट करत 10 विरुद्ध 7 गुणांची आघाडी घेत विजेतेपदावर कब्जा केला. अभिजीतच्या विजयानंतर भूगावच्या मामासाहेब क्रीडानगरीत प्रेक्षकांनी एकच जल्लोष केला. ही लढत पाहण्यासाठी राष्ट्रवादी काँग्रेसचे अध्यक्ष शरद पवार, केंद्रीय मंत्री नितीन गडकरी, पुण्याचे पालकमंत्री गिरीष बापट यांच्यासह अन्य नेतेमंडळीही उपस्थित होते. शरद पवार यांच्या हस्ते अभिजितला महाराष्ट्र केसरीची गदा देण्यात आली.

अभिजितचा आक्रमक पवित्रा
शनिवारी झालेल्या गादी आणि माती विभागाच्या लढतींमध्ये अनुक्रमे अभिजित कटके आणि किरण भगत यांनी विजय मिळवले होते. गादी विभागात अंतिम फेरीच्या लढतीत अभिजित कटकेने सुरुवातीपासून घेतलेला आक्रमक पवित्रा त्याच्या एकतर्फी विजयाचा शिल्पकार ठरला होता. आपल्या उंचीचा आणि भक्कम ताकदीचा उपयोग करत अभिजितने एकेरी पट, भारंदाज हप्ते डाव करत 10 गुण मिळवून तांत्रिक गुणाधिक्यावर विजय मिळवित सलग दुसर्‍या वर्षी महाराष्ट्र केसरी किताबाच्या अंतिम फेरीत धडक मारली होती. दुसर्‍या बाजूला सातार्‍याच्या किरण भगतने प्रेक्षणीय लढती करत उपस्थित प्रेक्षकांची मने जिंकली. माती विभागात अंतिम फेरीत बलाढ्य ताकदीचा बाला रफीक शेख याच्याबरोबर दिलेली चिवट झुंज त्याच्या वर्षभराच्या मेहनतीचे फळ देऊन गेली. आपल्या झुंजार खेळाच्या प्रदर्शनाने किरण भगतने अनपेक्षित अशी आक्रमणे करत बाला रफीकला हतबल केले आणि डोळ्याच्या पापण्या मिटण्याइतक्या अवधीत एकेरी कस काढून चितपट करीत माती विभागातून महाराष्ट्र केसरी किताबाच्या अंतिम लढतीसही आपले आव्हान उभे केले होते.

पुण्याच्या गणेश पेठेतल्या शिवरामदादा तालमीचा पठ्ठ्या
अभिजीत हा पुण्याच्या गणेश पेठेतल्या शिवरामदादा तालमीचा पठ्ठ्या आहे, तर किरण पुण्यातल्याच कात्रजच्या आंतरराष्ट्रीय क्रीडा संकुलाचा शिलेदार आहे. अभिजीत कटके आणि किरण भगत हे दोघंही एकाच वयाचे म्हणजे बावीस वर्षांचे आहेत. पण या वयातही त्या दोघांनीही महाराष्ट्राच्या कुस्तीत स्वतःची एक वेगळी ओळख निर्माण केली आहे. अभिजीत कटके हा मॅटवरचा मातब्बर पैलवान आहे. तो सलग दुसर्‍यांदा मॅट विभागाची फायनल जिंकून, महाराष्ट्र केसरी किताबाच्या कुस्तीसाठी पात्र ठरला आहे. किरण भगतने मैदानी कुस्तीचा हीरो म्हणून महाराष्ट्र केसरीत फायनलमध्ये पोहोचून ठसा उमटवला. त्याने माती विभागाची फायनल जिंकून, पहिल्यांदाच महाराष्ट्र केसरीसाठी लढण्याचा मान मिळवला. अभिजीतचे वजन या घडीला तब्बल 122 किलो आहे, त्या तुलनेत किरणचा वजन काटा हा 103 किलो आहे. अभिजीतला अमर निंबाळकर, भरत म्हस्के आणि हणमंत गायकवाड यांचे मार्गदर्शन मिळत आहे. किरण हा काका पवार आणि नामदेव बडरे यांनी घडवलेला पैलवान आहे.

प्रतिस्पर्धी पाहून रणनीती
अभिजीतने 2015 साली युवा महाराष्ट्र केसरीचा मान मिळवला होता. 2016 साली त्याने ज्युनियर राष्ट्रीय कुस्तीत कांस्यपदकाचा मान मिळवला होता. अभिजीतला गेल्या वर्षी महाराष्ट्र केसरी आणि हिंदकेसरीत उपविजेतेपदावर समाधान मानावे लागले. पण जमखंडीतल्या भारत केसरी किताबाने त्याच्यात नवा जोश भरला होता. किरण भगतने गेल्या काही वर्षांत गावोगावची कुस्ती मैदाने जिंकून आपल्या गाठीशी प्रचंड अनुभव बांधून घेतला आहे. कुंडलच्या मैदानात तर त्याने ट्रिपल महाराष्ट्र केसरी विजय चौधरीला हरवण्याचा भीमपराक्रम गाजवला होता. वयाच्या बाविशीतही अभिजीत एक परिपक्व पैलवान म्हणून ओळखला जातो. त्याचा बचाव आधीपासूनच भक्कम होता. पण आता त्याच्या आक्रमणालाही धार चढल्याचे दिसून येत आहे. किरण भगतही वयाच्या बाविशीत आक्रमक झाला आहे. पण समोरचा प्रतिस्पर्धी पाहून रणनीती आखण्यात आणि प्रतिस्पर्ध्याचा डाव त्याच्यावरच उलटवण्यातही किरण माहिर आहे.

केसरीसाठी दोस्तीत कुस्ती
अभिजीत आणि किरण यांच्यात मैत्री आहे. सोनीपतच्या राष्ट्रीय शिबिरात ही दोस्ती जमली. एकच वय आणि कुस्ती हे आवडते क्षेत्र असल्याने त्यांच्यातील दोस्ती आणि कुस्तीही बहरली. अभिजीत आणि किरण आज जितके सख्खे दोस्त आहेत, तितकेच ते दोघे पक्के पैलवानही बनले आहेत. अभिजीत आणि किरणच्या दोस्तीचे नाते खुप हळवे असल्याने महाराष्ट्र केसरीतील जय-पराजयानंतरही ते आबाधित राहणार आहे.