पुण्याचे दोन तरुण रायगडमधील धबधब्यात बुडाले

पुणे : रायगड जिल्ह्यातील माणगाव तालुक्यात प्रसिध्द देवकुंड धबधबा येथे पुणे, मुंबईतून मोठ्या संख्येने पर्यटक येत असतात. रविवारी पुण्यातील काही पर्यटक या धबधब्यावर वर्षा सहलीसाठी गेले होते. दुपारच्या सुमारास धबधब्याच्या पाण्यात सहलीचा आनंद घेताना दोन तरूण वाहून गेले. पुण्यातील भोसरी येथील अखिल चौधरी (23) व पुण्यातील नितीन पाठक (25) अशी या बुडालेल्या तरूणांची नावे आहेत.

सोमवारी एक मृतदेह सापडला
माणगाव तालुक्यातील भिरा येथे कुंडलिका नदीचे उगमस्थान आहे. याठिकाणीच धबधबा असून रविवारी दुपारी पुण्याहून आलेल्या पर्यटकांचे दोन गट धबधब्याखाली वर्षासहलीचा आनंद घेत असताना दोन तरूण बुडाले. त्यांचा शोध घेण्यासाठी तातडीने शोधकार्य हाती घेण्यात आले. माणगाव पोलिसांनी रिव्हर राफ्टर्सना पाचारण करून घटनास्थळाकडे धाव घेतली. त्यानंतर राफ्टर्सच्या मदतीने सायंकाळी उशिरापर्यंत या दोन्ही तरुणांचा शोध घेण्याचे प्रयत्न सुरू होते. त्यानंतर काळोख पडल्याने शोधकार्य थांबविण्यात आले. सोमवारी सकाळी पुन्हा शोधकार्य सुरू करण्यात आले असता, बुडालेल्या एका तरूणाचा मृतदेह दुपारी सापडला.

शिक्षणासाठी आले होते पुण्यात
भोसरी येथील अखिल चौधरी (23) व पुण्यातील विद्यार्थी नितीन पाठक (25) अशी बुडालेल्या तरूणांची नावे असून, अखिल मूळचा दिल्लीचा तर नितीन वाराणसीचा आहे. शिक्षणानिमित्त हे दोघेही पुण्यात राहात होते. काही दिवसांपूर्वी माणगाव येथील याच ठिकाणी मुंबई येथील 55 विद्यार्थी अडकल्याने त्यांची सुखरूप सुटका करण्यात आली होती.