पुण्याच्या तुरुंगातून फरार कुख्यात आरोपीची हत्या

पुणे-पुण्याच्या राजगुरूनगर येथील कारागृहातून मागील महिन्यात पलायन केलेल्या कुख्यात आरोपी राहुल गोयकर याची काल रात्री हत्या झाली. या घटनेने एकच खळबळ उडाली आहे. अहमदनगर जिल्ह्यातील कर्जत तालुक्यातील खंडाळा येथे ही घटना घडली आहे. जुन्या वादातून ही हत्या झाल्याचे सांगण्यात येते.

खंडाळा येथे राहणाऱ्या गोयकरवर अहमदनगर जिल्ह्यासह पुणे जिल्ह्यात शेकडो गुन्हे दाखल होते. खून, मारहाण, दरोड अशा गंभीर स्वरुपाचे त्याच्यावर गुन्हे दाखल होते. मागील महिन्यात तो कारागृहातून फरार झाला होता. बुधवारी रात्री १० वाजता गावातील जुन्या भांडणावरून राहुलचा गावातील काही लोकांबरोबर वाद झाला. वादाचे हाणामारीत रुपांतर झाले. यात काही जणांनी त्याला लाकडी दांडक्याने मारहाण करत हत्या करण्यात आली, असे समजते. राहुलची हत्या केल्यानंतर त्याचा मृतदेह रस्त्यावर फेकून दिला होता. पोलिसांनी घटनास्थळी धाव घेऊन मृतदेह राहुलचा असल्याची खात्री केली.

या हत्येप्रकरणी भाऊसाहेब बबन खंडेकर, बबन किसन खंडेकर, हौसराव गोयकर, संतोष गोयकर, राजेंद्र चौधरी, आणि तीन महिलांसह ८ जणांवर गुन्हा दाखल करण्यात आला आहे. पोलिसांनी ५ जणांना ताब्यात घेतले असून उर्वरित जणांचा तपास केला जात आहे.