पुण्यात चित्रपट थीएटरमध्ये मनसेचा राडा

पुणे – मल्टिप्लेक्समध्ये ५ रुपयाचे पॉपकॉर्न २५० रुपयाला का, असा प्रश्न खुद्द न्यायालयाने उपस्थित केल्यानंतर मनसे कार्यकर्त्यांनी आज थेट सेनापती बापट रस्त्यावरील पीव्हीआरमध्ये धडक दिली. यावेळी त्यांनी कर्मचाऱ्याला मारहाण करत राडा केला. याप्रकरणी मनसेचे पदाधिकारी किशोर शिंदेसह १० जणांवर गुन्हा दाखल करण्यात आला. मल्टिकप्लेक्समधील पॉपकॉर्नच्या किमतीवरून मनसे आक्रमक झाली आहे.

मनसे कार्यकर्त्यांनी पीव्हीआरच्या व्यवस्थापनाला ५ रुपयांचे पॉपकॉर्न २५० रुपयाला का असा जाब विचारला. तसेच १० रुपयांचा वडापाव १०० रुपयाला का विकता असे विचारून मनसे स्टाईलने आंदोलन केले. यावेळी मनसेचे किशोर शिंदे, रमेश परदेशी या पदाधिकाऱ्यांसह मनसैनिकांनी पीव्हीआरमधील खाद्यपदार्थ विक्री काउंटरवर जाऊन घेराव घालत आंदोलन केले. यावेळी किशोर शिंदे यांनी तेथील कर्मचाऱ्याला मराठी वाचता आलीच पाहिजे, असे खडसावले. दर न बदलल्यास तीव्र आंदोलन करण्याचा इशारा मनसेने दिला आहे.

हे आंदोलन करत असताना मनसे कार्यकर्त्यांनी तेथील कर्मचाऱ्यांनाही मारहाण केली. याप्रकरणी मनसेचे पदाधिकारी किशोर शिंदेसह १० जणांवर चतुशृंगी पोलीस ठाण्यात गुन्हा दाखल करण्यात आला आहे. या प्रकरामुळे पीव्हीआरमधील खाद्यपदार्थांच्या किमतीचा प्रश्न चव्हाट्यावर आला आहे.