मुंबईतील पुरातन ट्राम, बेस्टच्या ऐतिहासिक वस्तूंचे प्रदर्शन

मुंबई : येत्या 7 ऑगस्टच्या बेस्ट दिनाच्या अनुषंगाने बेस्ट उपक्रमातर्फे अनेक कार्यक्रमांचे आयोजन करण्यात आले आहे. या निमित्ताने 6 व 7 ऑगस्टला रवींद्र नाट्य मंदिर प्रभादेवी येथील पू.ल. देशपांडे कला अकादमी प्रदर्शन सभागृहात बेस्टच्या वस्तु संग्रहालयातील एतीहासिक वस्तूंचे प्रदर्शन आयोजित करण्यात आले असून 7 ऑगस्टला बेस्ट परिवारांसाठी स्नेह संमेलन भरविण्यात येणार आहे.

घोड्याने ओढल्या जाणार्‍या ट्रामची मजा घेता येणार
या प्रदर्शनामध्ये लाकडी ट्रामची आसने, ट्रामचा पुरातन रॉकेल किंवा हॅन्ड सिग्नल, घोड्याने ओढल्या जाणार्‍या ट्रामची व दुमजली विजेवरील ट्रामची चलप्रतिकृती, बेस्टच्या दुमजली बसची मोठी प्रतिकृती (सेल्फी पॉईंट) एकमजली व दुमजली ट्रामची मध्यम आकारातील लाकडी प्रतिकृती, विविध प्रकारच्या निवडक बसथांब्याची प्रतिकृती, मार्वे-मनोरी जलवाहतूक यांत्रिक नौकेची लाकडातील प्रतीकृती असणार आहे.

पुरातन बॅचेस, तिकीट यंत्रे
बेस्ट बसेसच्या हुबेहूब कागदी प्रतीकृती, सात बंगला बस स्थानकाचे प्रतीकृती, बसच्या संथगती मोटारवर फिरणार्‍या प्रतीकृती, इत्यादी वस्तूंचा प्रदर्शनात अंतर्भाव असणार असून हे प्रदर्शन नागरिकांना मोफत पाहता येणार आहे. या प्रदर्शनात बॉम्बे ट्राम वेज कंपनी 9 मे 1874 ते बॉम्बे इलेक्ट्रिक सप्लाय आणि ट्राम वेज कंपनी 2 ऑगस्ट 1905 ते 7 ऑगस्ट 1947 रोजी महापालिका करणानंतरची बेस्ट या दरम्यानच्या काळातील ऐतिहासिक माहिती असेल. तसेच पुरातन तिकीट यंत्रे, वाहतूक विभागाचे पुरातन बॅचेस, तिकीट यंत्रे, वाहतूक विभागाचे पुरातन बॅचेस, तिकीट पंच, बटणे, शिटी, पुरातन लाकडी तिकीट बॉक्स इत्यादी ठेवण्यात येणार आहे.

हे मान्यवर असणार उपस्थित
या प्रदर्शनाचे उदघाटन शिवसेना खासदार अनिल देसाई आणि पालिका अतिरिक्त आयुक्त संजय मुखर्जी यांच्या हस्ते होणार असून 7 ऑगस्टच्या स्नेह संमेलानाचे उदघाटन खासदार सुभाष देसाई तसेच महापौर विश्वनाथ महाडेश्वर यांच्या हस्ते होणार आहे.